Cavani hoin Uruguay an tlang

World champion hmasa ber Uruguay chuan Copa America 2021 khelh laiah quarterfinal an lut. Uruguay tan hian Edinson Cavani-a'n goal a khung bakah Bolivia defender Jairo Quinteros chuan anmahni lamah a ti lut.

An match hmasa lama beisei phak lo Uruguay hi 2-1 a an chak avangin group A-ah palina an ni a, khelh hmabak pakhat an la neihah an dinhmun an la ti sang thei ang; table chung lama awm hian knockout stage lamah team nem zawk a hmachhawn thei dawn.

Match thum an khelh tawh china chak la nei lo Bolivia erawh an tla chiang ta. Group match hnuhnung berah hmahruaitu Argentina an hmachhawn zui dawn a, point hmu loa inelna an mangṭha mai a rinawm.

Uruguay hian tun inelnaah hian goal khung an harsat, Argentina laka an khung loh bakah Chile an hmachhawn ṭumin goal khat bak an nei thei lo. Bolivia hmaah pawh Luis Suarez leh Cavani te an vannei tawk lo a, goal khung an harsat leh hle.

Mahse, chawlhlawk hma deuhin Bolivia defender Jairo Quinteros chuan Giorgian de Arrascaeta-a cross chu anmahni lamah a ti lut palh a, hun tawp hma minute 11 chauh awm tawhah Cavani chuan tun inelna bika a goal hmasa ber a khung.

Manchester United striker Cavani hian ram tan match 121 a khelh aṭangin goal 52 a khung tawh a, an group match hnuhnung bera Paraguay an hmachawn hunah pawh khung chhunzawm ngei a tum ang.

Uruguay coach Oscar Tabarez chuan, "Kan goal khung zat khan inkhel kan thunun dan a tarlang chhuak phak lo. Bolivia kha goal khung theihna remchang kan pe lo thei a, keini lamin hun ṭha kan hmu nual thung. Kan chak vangin a lawmawm a, chutih rualin hmabak kan la ngah," a ti.

Group A aṭangin Argentina, Paraguay, Chile leh Uruguay an tling. Group B lamah Brazil leh Colobia an tling tawh a, match hnuhnung berah Peru, Ecuador leh Venezuela ten hmunruak pahnih an inchuh ang.