Team ṭha Netherlands an tlang dawn em?
Frank de Boer enkawlna hnuaiah Netherlands-in rin hlawh lo tak chungin Euro 2020 an pan a, group stage match thum aṭanga an point hmuh zat erawh point kua a ni.
Pathianni zan dar 9:30-ah he Netherlands team hian last 16 match an khel dawn a, an hmachhawn tur chu Czech Republic an ni - chak tura beisei an ni ang.
Hriat tel tur erawh Netherlands hian an group stage match chu Amsterdam khawpuiah vek an khel a, Pathianni zan an inkhelhna tur erawh Budapest khawpui a ni - khawtual angin ṭantu an ngah bik tawh dawn lo.
Sakeibaknei thinlung
Czech chanchinbu lar Sport chuan, "Sakeibaknei thinlung putu," tiin Memphis Depay-a chungchang an ziak a, Barcelona player thar hi Czech team-in chak an duh chuan ven bik a ṭul dawn.
Depay hian Euro-ah goal hnih khungin assist vawi hnih a nei tawh a, 3-5-2 formation-ah Wout Weghorst nen inkawp leh tura ngaih an ni a, an hnung chiahah goal thum khung tawh Georginio Wijnaldum a awm dawn avangin a harsa ang.
Midfield-ah Frenkie de Jong te ho an awm avangin Dutch team an ngaihtuahawm a, tlarhnungah erawh Matthijs de Ligt awm hnu pawha an la nghin fo avangin goal thum khung tawh Patrik Schick-a'n a zuam mai thei.
Tihdan hria
Euro 2004-ah khan Czech hian group stage-ah 2-0 a an hnufual hnuin Netherlands chu 3-2 in an hneh let a, hei hi Czech chanchinbu Sport chuan la hre rengin, "Dutch ho hneh dan kan hria," tih chu chanchinbu phek hma berah an ziak!
A tak ram erawh a dang daih - khatihlaia Czech team-ah khan player ropui Pavel Nedved, Petr Cech, Tomáš Rosický, Marek Jankulovski, Vladimír Šmicer, Milan Baroš leh Jan Koller-te ho an awm a, tuna Czech squad-ah erawh 'star' player tia sawi tur an awm meuh lo.
Czech tana buaina tur pakhat chu left back Jan Boril-a'n hrem vangin Netherlands a hmachhawn thei dawn lo a, Hoffenheim defender Pavel Kaderábek emaw Brescia defender Ales Mateju emaw chu lut tura beisei an ni.
Czech star Shick
Patrik Schick hming lam rik a ṭul leh ṭhin a, Bayer Leverkusen striker hian group stage-a an ram goal khung pathum chu a khung vek a ni - Netherlands tlarhnung tan ven bik a sual lo ang.
Czech team hian 4-2-3-1 hmangin tlarhnung ven an ngai pawimawh ṭhin a, an chakna hnar a ni bawk - defensive midfielder hna chelh turin Tomáš Soucek a awm a, West Ham defender Vladimír Coufal a awm bawk.
He team hian group stage-ah goal hnih chiah an chhuah a, group stage match thum leka goal riat khungtu Netherlands nena an inkhel tur hi a hmuhnawm dawn.