Suns lakah Clippers an la tlawm lo

Match hmasa pahnihah chak lo mah se Los Angeles Clippers an la tlawm duh bik lo. Nimin zing khan Clippers hian an mikhual Phoenix Suns chu 106-92 in an hneh a; beiseina an la neihzia a takin an lantir.

Western Conference finals khelh laiah Suns hian best-of-seven series-ah 2-1 in hma an la hruai. June 27, Pathianni hian game 4 an khel leh dawn a, tlang tur chuan vawi li tal chak a ngaih avangin game 5 an khelh thlen ngei a ngai dawn tih a chiang tawh.

Clippers tan hian Paul George-a'n point 27 a nei a, ani bakah hian point 23 neitu Reggie Jackson a che ṭha bawk a, player dang pahnih - Ivica Zubac (15 points) leh Terance Mann (12) te an thawh hlawk bawk avangin hnehna an chang.

Regular season lama che ṭha zawk Suns player zingah che fuh tawk an awm lo - point 20 nei tling thei an awm lo a, player panga ngawtin point 10 chuang nei thei mah se chakpui nan a tawk zo lo.