Arsenal-in Ben White an dawr nawn
England defender Ben White lak tumin Arsenal chuan Brighton & Hove Albion an dawr nawn, an dawr hmasakna hnawlsak ni mah se Gunners hian an tlarhnung thuam chak an tum avangin an beidawng duh lo.
Tun thlatir khan Arsenal hian White lak tumin pound maktaduai 40 an lo tawktarh tawh a, mahse hnawlsak an ni. Tun hnaiah pound maktaduai 50 sen huamin Brighton an dawr nawn leh a, sum inpek an tum danah la inrem thei chiah lo mah se an inrem ngei a rinawm.
Kum 23 mi defender manah hian Brighton chuan pound maktaduai 50 a hlawma hmuh an duh, amaherawhchu Arsenal lam hian pound maktaduai 45 pek phawt a, chumi hnuah pound maktaduai nga dang chu pek belh leh tura tih an duh.
Brighton aṭanga inzir chhuak White hi 2019-20 season khan Championship lamah Leeds United tan hlawh-tling takin a khel a, season liam ta khan a club pangngai tan hian hun duhawm a hmang chhunzawm leh bawk.
Premier League match 36 zetah a inlan a, ball a thiam avangin midfield a pui thei bawk. White hi Brighton inhamtan theih nana tha thawh hlawk zinga mi a ni a, league goal 46 an chhuah chu an elpui dangte nena khaikhin chuan an chhuah tlem hle.
Feet ruka sang defender hian season a hman ṭhat avangin hriat a hlawh. Liverpool defender Trent Alexander-Arnold inhliam hnuah Euro 2020 khel turin England tan koh leh hnuhnawh a ni a, a kum a la tam loh avangin hmabak êng tak a nei.
Mikel Arteta-a'n tlar-hnung laia khel turin ke vei lam hmang thiam Pablo Mari leh Gabriel te a nei sa a, ke dinglam hmang thiam Rob Holding leh William Saliba te la awm mah se David Luiz a chhuah avangin White hi an mamawh.
Spanish manager Arteta hian season hmasa khan Saliba a ring zo lo a, loan hmangin a chhuahtir. Emirates Stadium-ah White hi a seng lut a nih chuan rawlthar Saliba hi an hralh emaw, loan hmanga chhuahtir leh emaw a nih a rinawm.
Arsenal hian an defender Konstantinos Mavropanos chuan Stuttgart lamah loan hmangin an chhuahtir tawh a, Bundesliga club hian an duh a nih chuan loan hun a zawh hunah pound maktaduai thumin an lei thei ang.