Wimbledon khel lo tur Dominic Thiem

US Open champion Dominic Thiem chuan Wimbledon a khel thei dawn lo. World number 5 hi a banrek hliam a la dam lo a, grass court inelna lianah hian a hmel kan hmu thei dawn ta lo a ni.

Thawhlehni khan Thiem hi Mallorca Open-ah a inlan, a dinhmun a ṭhat laiin a banrek a tihliam a, a inhnukdawk zui bawk. A hliam vang hian ball vuak a harsat a, tunah chuan eng chen nge a chawlh dawn erawh hriat theih a la ni lo.

Kum 27 mi Thiem chuan, "A rang thei ang bera ka dam leh theih nan hma ka la dawn, chumi atan chuan doctor-in ti tura min tih ang zawng zawng chu ka ti ang," a ti, a rei lo berah pawh kar nga vel tal chu a chawlh a ngaih a rinawm.

Season hmasa khan Thiem hian US Open nomawi a chawi a, a hnu lamah erawh ropui takin a la khel leh hleithei lo. Final vawi hnih a luh tawhna French Open-ah hneh nei loin a tla, tunah chuan New York lama inelna hmachhawn theih dan a ngaihtuah a ngai tawh dawn.

Austrian tlangval hian Tokyo Olympic a khelh loh tur thu a lo sawi tawh bawk a, atan season duhawm lo tak a ni. Tun anga a boruak a ṭha lo zel a nih chuan September thlaa khelh tur US Open-ah pawh nomawi humhim a harsa ang.

June 28 aṭanga khelh tur Wimbledon-ah hian Rafael Nadal pawh a lo inhnukdawk tawh. Spanish star hian grass court season chu clay court inelna nen a inhnaihchilh em avangin a khelh loh mai tur thu a sawi a ni.

Nikum khan hripui leng vangin Wimbledon hi an khel thei lo, indopui pahnihna hnua an ṭhulh hmasak ber a ni hial. Kuminah erawh a hmuna entu awm chungin an khel dawn, mipa leh hmeichhe singles final phei chu stadium khatin entu an awm thei dawn.