Spurs leh Nuno an inhnaih

Tottenham Hotspur-in coach zawn hna an thawh chhunzawm zel a, Wolverhampton Wanderers boss hlui Nuno Espirito Santo nen an inhnimhnai tawh hle nia sawi a ni.

Spurs hian April 19-a Jose Mourinho an ban hnuah Portuguese manager thlaktu tur an hmu hleithei lo a, a tira lam rik Julian Nagelsmann-a'n RB Leipzig aṭanga Bayern Munich zawm a thlang.

Leicester City boss Brendan Rodgers leh Ajax coach Erik ten Hag te hming lamrik leh ni mah se an awmna club-a cham chhunzawm an thlang a, an coach hlui Mauricio Pochettino chu be leh mah se Paris St-Germain-in an chhuah phal lo.

June thla khan Spurs hi Inter Milan leh Chelsea boss hlui Antonio Conte nen sawizawm leh ni mah se an inrem thei lo a, Roma boss hlui Paulo Fonseca lam an hawi zui.

Kar hmasa khan an inrem tawh mai tura ngaih a nih hnuin Spurs hian Fiorentina aṭanga chhuak hlim Gennaro Gattuso lam an hawisan zui a, mahse, fan-ten Gattuso duh lohna an lantir avangin thui tak an kalpui hman lo.

Kum 47 mi Nuno hian May thla khan Wolves a chhuahsan a, kum li a cham hman. Molineux-a a season hmasa berah Championship nomawi a chawi nghal a, Premier League-ah season hnih chu a zawnin pasarihna a nihpui zui.

Season hman zawh takah erawh 13-na an ni a, September khan Wolves-ah kum 2023 thleng cham turin contract ziak mah se May-ah a chhuahsan ta zawk.

Nuno hi Everton leh Crystal Palace nen pawh sawizawm a lo ni tawh a, Spurs-ah a kal ngei hmel ta zawk - he thuziak i chhiar meuh chuan an inlalut fel tawh hial mai thei.