Mipui 140,000 pungkhawm thei dawn

July 18 hian Formula 1 British Grand Prix tlan a ni dawn, car intlansiakna sang berah hian a hmuna intlansiak enturin Silverstone tlankawngah mipui a khata punkhawm an phal dawn - a hmuna entu awm thei zat chu 140,000 a ni.

Hripui leng vangin hun rei tak chhung chu Britain ramah hian a hmuna entu awm loin inelna an nei ṭhin a, tun hnaiah thlahdul deuh niin stadium chhungah mipui an lut thei leh ṭan tawh.

Euro 2020 chu a hmuna entu an awm theih bakah Wimbledon final phei chu stadium khatin a entu an awm dawn - F1 entu an awm tur hi a mak hran lo a, tlan kawngah mipui awm theihna a zau avangin pungkhawm an tam tur pawh hi thil mak a ni lem lo.

Britain tlangval, F1 champion lai ni bawk Lewis Hamilton chuan, "Mipui himna leh hriselna hi ka ngai pawimawh, chutih rualin infiamna huang aṭanga ka thlir erawh chuan Silverstone khat tlatin mipui awm thei se ka duh," tiin a sawi.

Car intlansiak entur zinga puitling chin chuan invenna (vaccine) an lak ngei a ngai dawn a, naupang lam tan erawh inkaihhruaina hi a hrana siam leh tur a la ni ang.