Euro khel zo Kauko-a'n Bagan a zawm

Finland midfielder Joni Kauko chuan Euro 2020 aṭanga an tlak hnu lawkah ATK Mohun Bagan a zawm thu puan a ni a, season tharah chuan Indian Super League-a khel dawn tihna a ni.

Kum 30 mi midfielder hi Euro 2020-ah an ram aiawhin a feh chhuak a, group stage match thuma Denmark, Russia leh Belgium an hmachhawnna inkhelahte bench aṭanga lutin a inlan vek.

Bagan chuan social media lamah thuchhuah siamin, "Finnish midfielder Joni Kauko chuan kum hnih chhung atan kan club a rawn zawm a ni," an ti a, Kauko pawh hian, "Mariners, kan inhmuh thuai ka beisei," tiin social media lamah a tarlang ve bawk.

Finland tana vawi 28 inlan tawh Kauko hian Finnish top division club Inter Turku aṭangin a career a ṭan a, German second division club FSV Frankfurt a zawm zui.

Frankfurt-ah kum hnih a khelh hnuin German second division club FC Energie Cottbus a zawm leh a, kum 2016-ah Denmark Superliga lamah pemin Randers FC leh Esbjerg a zawm.

Esbjerg hi 2019-20 season khan second division lamah an tla thla a, Kauko pawh hian season hmasa kha Danish second division lamah a khel - match 26-ah goal riat khungin assist vawi hnih a nei.

Euro khel zo chiah ni mah se Kauko hlawh hi a sang hran lo niin Vanglaini chuan thu a dawng a, Bagan player hlawh hnem ber Roy Krishna a phak lo rih hle.

Fijian striker Roy Krishna hian kum khatah nuai 550 a hlawh mek a, Kauko hian season hmasa khan nuai 206 bawr vel a hlawhah ngaih a ni - Kolkata club-ah a hlawh san belhna hi a tam lo ang.