Italy tan inelna tak a inṭan dawn

Euro 2020 khelh laia team nghet leh phui ṭha bera ngaih chu Italy an ni. Azzurri hian zanin dar 12:30 hian last 16 khel turin Austria an hmachhawn dawn a, coach Roberto Mancini chuan an tan inelna hautak a inṭan tur thu a sawi.

Italy hian an group match chu an khawpui Rome-ah vek an khel a, zanin an inkhelhna tur erawh Wembley Stadium a ni tawh dawn a, anmahni khelmual pawn lamah eng ang taka ṭha nge an nih chu fiah a ni ang.

Darkar 30
UEFA chuan Italy leh Austria tan Zirtawpni khan Wembley-ah training neih a rem lo tih tun hnai khan an ti chiang a, hei vang hian Italian Football Federation (FIGC) chuan an ram team hian England-ah darkar 30 vel bak hun an hman loh tur thu an sawi.

Nimin chawhma lam khan Azzurri hian last 16 bik atana an training hnuhnung ber chu an ramah an nei a, chawchhun ei zawh hnuah England lam an pan chauh; Rome khawpuia league match khelh nen chuan boruak a danglam dawn tih a chiang.

Britain ramah Covid-19 a la hlauh-awm a, heivang hian Italy leh Austria aṭangin tun hma ang chuan fans tan duhtawka sapatal theih a ni dawn lo. Austria Ministry of Foreign Affairs chuan, "A hmuna inkhel en lo turin kan in ngen tak meuh," an ti hial.

Wembley Stadium-ah entu an awm thei dawn a, ram pahnih sorkar thuneitu lamin fans hi zin tam lo turin duh mah se dan anga inkhap a nih loh avangin a chhunga lut thei chin erawh chu an kalkhawm ang tih a chiang tho.

Tlarhnung phui
Italy hian inelna hrang hrang an match hnuhnung 30-ah tlawm an nei lo, 1935-1939 chhunga an record chu an nihrual mek; tluang taka an kal theih chhan pakhat chu an tlarhnung phui ṭha hi a ni, zaninah pawh an inremphui leh viau tura ngaih a ni.

Switzerland an hneh ṭuma hliam Giorgio Chiellini a dam tawh a, training zawm tawh mah se an captain hian inkhel bul a ṭan a la rinawm lo a, tawnhriat nei ṭha Leonardo Bonucci leh Francesco Acerbi te an inkawp a rinawm.

Right back Alessandro Florenzi chu 100%-in a fit lo bawk a, a hmunruakah Rafael Toloi ai chuan Giovanni Di Lorenzo a luh a rinawm. Midfielder Marco Verratti-a'n a awm loh hlana khel ṭha tak Manuel Locatelli a nek chhuak thei ang em tih hriat a châkawm.

Azzurri coach Mancini chuan, "Verratti or Locatelli? a ṭha pakhat zawk a awl a ngai dawn," tiin a player pahnih chungchang a sawi. Paris Saint-Germain midfielder Verratti hi a hman thiam ṭhin ni mah se inelna tir lamah hliam vangin a inlan lo, Wales lakah erawh a khel ṭha hle.

Austria an zam lo
Austria leh Italy hi inelna hrang hrangah vawi 13 an inhmachhawn tawh a, Austria hian chak ni hmel an la hmu ve ngai lo; an intawn hnuhnung ber 2008 August thla khan 2-2 in an inhnehtawk, tun ṭuma hian Franco Foda naute hi rinkai lo zawk an ni dawn.

Euro last 16 vawi khat khelhna tur Austria coach Foda hi Italian thisen kai a ni, a pa hi Italian lam mi ni mah se Germany-ah a piang thung. Group match pathum an khelh china a naute khelh dan thlak vektu hian Italy lakah eng tiangin nge a naute a rem dawn hriat a la ni lo.

Real Madrid player thar David Alaba a pawimawh dawn a, Beyern Munich defender hlui hi midfield-ah nge tlarhnung laiah a hman ang tih an inrinsiak; tlarhma lama awm tur Marko Arnautovic chuan Italian tlarhnung an hlauh loh thu a lo sawi ve thung.

West Ham forward hlui Arnautovic chuan, "Italy ṭhatzia kan hria, a bik takin match 11 chhung goal chhuah loa an kaltluan dan pawh kan hria, mahse tunah chuan minute 90 chhung inkhel tur kan nih avangin kan hlau bik lo," tiin a sawi.