Wales vs Denmark: A hmuhnawm dawn

Euro 2020 round of 16 match hmasa ber chu zanin dar 9:30 hian khelh a ni dawn a, Wales-in Denmark an hmachhawn dawn.

Ram pahnih hi 'top team' huanga dah rem lo mah se tun hnaia Christian Eriksen-a chunga thil thleng vang te, Gareth Bale hoa Wales-in an khelh dawn vangtein he inkhel tur hian ngaihven a hlawh.

Team pahnih an intiat tawk miau avangin inkhel a hmuhnawm dawn tih a chiang a, vawi 10 an intawn tawhah draw result a awm miah lo - team pahnihin attacking game an khel dawn.

Wales boss Rob Page chuan, "A sang thei ang ber thlen kan duh a, mahse, Denmark kan hriat avangin kan fimkhur ang. Hriat tel dang erawh kan la nei a, kan khelh ṭhat ni chuan eng team pawh khel turin kan ṭha tawk," a ti.

Zinkawng ngaihnawm
Denmark-in Finland laka an match hmasa berah Eriksen an chan a, a thawnthu hrilh nawn kan ngai tawh lo - match tawp berah last 16 lut turin chak an mamawh a, mamawh hunah tak an par.

Danish team hian team ṭha Russia chu 4-1 in an sawp a, Wales nen an inkhel dawn tih a chian rual khan Eriksen chu Tottenham Hotspur tana a khelhpui ṭhin, Wales defender Ben Davies nen an inbia.

Davies chuan, "Eriksen-a'n team harsa tak kan hmachhawn tur thu min rawn hrilh a ni," a ti a, Eriksen hian a sawi sual lo - tactic leh thil dang piahlamah Denmark hian thil neih an nei a, chu chu huaisenna a ni.

Russia laka an khelh dan en chuan Denmark team huaisenzia an hai lo a, Wales laka hnehna chang turin he team hi an ṭha tawk tih an hmu bawk ang.

Huaisenna piahlam
Denmark-in 3-4-2-1 hmangin attacking football an khel ṭhin a, Belgium leh Russia lakah he an attacking game hmuhnawm hi hmuh turin a awm - Belgium lakah pawh an chak lo chungin vawi 21 zet shot an nei a, Russia lakah vawi 16 zet shot an nei bawk!

Tlarhmaah goal hnih khung tawh Yussuf Poulsen a maltlat leh ang a, RB Leipzig striker thlawp turin rawlthar beiseiawm Mikkel Damsgaard leh Barcelona forward Martin Braithwaite an awm ang a, midfield-a Pierre-Emile Hojbjerg ṭangkaina sawi hmaih a thiang lo.

Denmark hian tlarhnungah pawh Chelsea defender Andreas Christensen, Southampton centre back Jannik Vestergaard leh AC Milan centre back Simon Kjær te an rem thei a, wing back-a khel turin Atalanta full back Joakim Mæhle leh Valencia full back Daniel Wass an nei.

Danish team enkawltu Kasper Hjulmand chuan, "Kan inbuatsaih ṭha a, eng thil pawh thleng se, hmachhawn turin kan inpeih. A khaikhawm nan chuan kan inbuatsaih ṭha a, inkhelh kan châk tawh a ni," a ti a, Wales a hlau lo.

Wales an ṭha tawk
Last 16-ah Wales an lut a, he team hi Denmark hneh tura ṭha tawk loa ngai tan chuan group stage-a an inkhel thlirlet mai tur a ni. Wales hian team ṭha Switzerland (1-1) an draw hnuin Turkey (2-0) an hneh a, Italy lakah kim loa hun tawp an hmang chungin 1-0 chiahin an tlawm bawk.

Davies chuan, "Kha group aṭanga talchhuah kha thil awlsam a ni lo," tiin a sawi a, a thusawi ṭawmpuitu an tam zawk ang. Mahse, chu thusawiin a tarlan tel chu Wales an ṭha tawk tihna a ni a, Denmark lakah tlawm tura rin ngawt a fuh lo ang.

Wales boss Rob Page-a'n ruahmanna hrang hrang a nei tih group stage-ah a tarlang tawh a, Denmark lakah erawh 4-1-4-1 bawk hmang leh tura rin a ni - tlarhmaah Kieffer Moore a mal tlat leh dawn tihna a ni.

Cardiff City striker hian season hman zawh takah khan Championship-ah goal 20 a khung thei a, Euro 2020-ah goal khat a khung tawh bawk. Kum 28 mi striker hi 6ft 5in ngawta sang a ni a, a palenna ringawt pawh hi ven tham a tling.

Bale an nei
Wales-in Bale an nei a, Real Madrid forward hian a vanglai phak tawh lo mah se Turkey lakah a khelh ṭhat ni chuan khawvela player hmachhawn châkawm lo ber pawl a ni tih a pholang a, a khelh danin Wales hma hun thui takin a hril ang.

Bale hian mual vei lam sir aṭangin goal nawr a pui ang a, ding lamah player tlan chak bik Daniel James a la awm dawn cheu avangin Wales goal nawr hi a nat loh ring suh.

Juventus midfielder Aaron Ramsey-a'n Serie A lamah hmun pawimawh chang lo mah se Wales tan chuan 'top' player a la ni reng tih hmuh turin a awm a, Joe Allen hi 'Welsh Pirlo' an tih khawpa ram tan chuan player danglam bik a ni.

Wales keeper Danny Ward hi Leicester City-ah tuna Denmark keeper Kasper Schmeichel thachhang dawltu a ni a, mahse, ram tana inlan tur chuan Ward hian thlang zawktu tam tak a nei ang - tun Euro-ah phei chuan player langsar pawl a ni phak tlat.