English player to ber tur Grealish?

Manchester City chuan Aston Villa captain Jack Grealish lakluh tumin hma an la ṭan a, England international midfielder man atan hian pound maktaduai 100 vel bawr an theh chhuak phal niin khawtlang media chuan an tarlang.

Premier League player manto ber chu Paul Pogba a ni a, 2016 khan Manchester United chuan Juventus aṭangin France international hi pound maktaduai 89.3 zetin an lalut - Man City leh Grealish indawrna hian a khum dawn niin a lang ta.

Pep Guardiola enkawl City hian season hmasa khan hnehsawh takin league title an la, amaherawhchu an duh tak Champions League-ah erawh Chelsea an ngam lo, an elpui club an ngam loh avangin inthuam chak zual an tum.

City hian player lei nan sum an hmang hnem ṭhin, mahse player pakhat lei nan pound maktaduai 65 aia sang an la seng ngai lo. Grealish bakah hian Tottenham striker Harry Kane pawh an ngaihven a, lakluh tumin hma an la mek bawk.

Guardiola-a'n a player duh pahnih la tur chuan sum a hman hnem ngei a ngai dawn, tlarhma lama chhawr tur an nih avangin a neihsa ṭhenkhat chu a chhuahtir a rinawm, chhuak thei zingah Raheem Sterling, Gabriel Jesus leh Bernardo Silva te hming a ri ring.

Man City hellai Kane leh Grealish hi Euro 2020-ah England tan an feh chhuak mek a, last 16 an lut tawh. Gareth Southgate-a naute hian June 29, Thawhlehni zanah Germany an hmachhawn leh dawn a ni.