Away goal rule a awm tawh dawn lo!

European football-a thuneitu sang ber UEFA chuan season thar aṭangin away goal rule chu inelna an buatsaihah chhiar a nih tawh loh tur thu an sawi a, khualmuala goal khung hnem vanga chak zawk a awm tawh dawn lo tihna a ni.

Kum 1965 aṭang khan away goal rule hi hman ṭan a ni a, he danah chuan club pahnih an inhnehtawk chuan khualmuala goal khung tam zawk chu chak zawkah puan an ni ṭhin - season thar aṭang erawh chuan a ni tawh dawn lo.

UEFA president Aleksander Ceferin chuan, "Away goal-in hlutna sang zawk a nei reng anga kan dah hi a rem tawh lo a ni," a ti a, thutlukna thar an siam chhan a sawi.

Dan thar chu
UEFA hnuaia club competitions committee chuan May thla khan away goal rule thlak danglam tur hian UEFA hnenah an lo thlen tawh a, UEFA executive committee chuan he rawtna hi pawmin a kaltlangpui dawn ta a ni.

Champions League, Europa League, Europa Conference League leh Women's Champions League te chuan away goal rule hi an hmang tawh dawn lo tihna a ni a, khualmuala goal khung vanga ngaih ṭhat viau kha a awm thei tawh lo ang.

UEFA hnuai inelnaah home & away goal belhkhawma team pahnih an inhnehtawk a nih chuan khualmuala goal khung tam zawk en tawh loin extra time khelh nghal a ni ang a, chak zawk an la awm lo cheu a nih chuan penalty hmanga chinfel nghal tur a ni.

A chhan
Away goal rule hman a nih chhan tak hi mahni muala khel team-ten 'advantage' an nei ṭha zawk anga ngaih a nih ṭhin vang a ni a, tun hma chuan khualmuala inkhel tura zin a hautak a, khelmual a inthlau ṭhin a, stadium thlengin lenluh a innawm hleih viau zel.

Mahse, khawvel ṭhang zelah heng zawng zawng hi European football chinah chuan a bo tawh - zin a awlsam a, stadium an intluk tlang a, khelmual ṭhat dan a inang tlang a, technology lama hmasawnnain video assistant referee thlenga hman theih turin a chhawp ta bawk.

UEFA chuan heng zawng zawng ngaihtuah hian away goal hlutna hi a hranin a awm tawh loah a ngai a, UEFA chuan 1970 aṭang khan zawi muanga home advantage awm ṭhin chu a bo tial tial thu an sawi.

Tichuan...
UEFA chuan, "Tun hma angin mahni home a khelh avanga goal khung hnem bik ang kha a tam ta lo a ni," a ti a, home advantage a tlem tak thu a sawi - chhutna aṭanga a lan danin away goal rule hman a nih ṭhin lai khan home team-ten 2.02 goal an khung ang a ni a, tunah chuan 0.95-ah a tlahniam a, away goal 1.58 chu 1.15-ah a tlahniam bawk.

Ceferin chuan, "Away goal rule hman chhan a nih kha tun ang hunah chuan awmzia a awm tawh lo a, a nihna dik takah chuan home team-te a ti dawih zawk hial - mahni muala goal chhuah hlauh avangin attacking game an khel ngam lo.

"Hei bakah hian a 'lai' tawk loa sawina a awm bawk. A bik takin extra time khelh a nihin away team tan goal khat a tawk laiin, home team tan goal hnih khung bik zel a ngai a ni," a ti a, thutlukna an siam chhan a sawi.