A ngai bawk! An khingpui inthlak ṭhin mah se, an result chu a ngai bawk a ni.
Nimin chawhnu I League inkhel hmuhnawm takah Aizawl FC leh Churchill Brothers te 2-2 in an inhnehtawk. Mizoram Premier League champion Aizawl FC-in tun season I League an mual RG Stadium-a khelhah hneh loh la tawng lo mah se hneh an la nei lo.
Aizawl FC hian minute 45-naah Abdoulaye Kanoute hmangin goal an khung hmasa a. Churchill Brothers-in Robert Junior Primus (64') leh Vinil Poojary (78') te goal hmangin an lehthal. Mizo club-in an mualah tlawm duh loin minute 80-naah Isak Vanlalruatfela hmangin si phurh an sut.
Standly Rosario hote phur chhoin Kanoute hmangin chakna goal khungah inngai mah se offside vangin pawm a ni lo.
Mizo 12
Aizawl FC-in foreigner pathum Alfred Kemah Jaryan, Richard Kassaga leh Abdoulaye Kanoute te bul ṭantirin a bak player pariat chu Mizo an ni a. Churchill Brothers tan Lalkhawpuimawia leh Vanlalduatsanga ten bul an
ṭan bawk.
Goan club-in bench aṭangin Lalengzama Vangchhia an luhtir a, AFC lamin substitution an siam ve bawk avangin inkhelh tawp lamah khelmual chhungah Mizo 12 an awm.
Kanoute Goal
Churchill Brothers-in bul an ṭan ṭha zawk a, goal chance pawh an ngah zawk. Amaherawhchu, minute 45-naah Joe Zoherliana cross chu Churchill keeper Jafar Mondal-a'n dang perin Kanoute-a'n goal hmahruai khung nan
a hmang. Goal luh hnu lawk hian Vinil Poojary goal khung tur chu AFC keeper Lalawmpuia'n ṭha zetin a dang a, Goan club striker chhuanvawr Willis Plaza a inhliam zui bawk avangin Mizo club vanneih ṭum tur a ang hle.
Tlarhnung pawp
Aizawl FC-in match hnu-hnung pathumah an goal neih an hum thei lo vek a, goal khat nei tawh mah se inrintawkna an nei lo. Minute 64-naah substitute Israil Gurung-a freekick chu keeper Lalawmpuia'n chhut sualin Robert Primus-a'n si phurh sut nan a hmang.
Goan club-in an hun ṭha neih hmang ṭangkai lehin Vinil Poojary-a'n minute 78-naah hmahruaina goal a khung a, Churchill Brothers chak thei dinhmunah an ding.
Referee thutlukna dik lo
Aizawl FC phurna siam turin Churchill keeper Jafar Mondal a chesual a, a ball man per chu minute 80-naah Isak-a'n goal a khung a, 2-2 a ni.
Churchill an talbuai a, Alfred Kemah Jaryan-a ball pet kawh ṭha tak chu keeper Jafar Mondal-a'n dang mah se a per chu Kanoute-a'n goal-ah a chantir. Amaherawhchu assitant referee-in AFC striker hi offside-ah ngaiin flag a phar a, replay-ah erawh Kanoute hi a offside lo.
Aizawl FC an vanduai a, Churchill nen 2-2 in an inhnehtawk. Mizo club hian an mualah Mohun Bagan, Chennai City, Punjab FC leh Churchill Brothers te an mikhual tawh a, point khat vek an hlawh chhuak. Inkhel kalhmang thlirin Bagan nen tih loah chuan point thum hmuh vek an phu avangin Mizo club hi an vanduai hle.
