Pogba an zai hlawhtling

Manchester United midfielder Paul Pogba chu Thawhelhni khan a kerek hliam zai a ni a, a hliam hi hlawhtling taka zai a nih thu Pogba chuan a sawi chhuak.

Kum 26 mi Pogba hi season kal laiah hliam vangin a buai ngun hle, match riat chiah a la khel. Nikum December thla khan inkhel leh thei tawh tura ngaih ni mah se hun rei zawk chawl turin a hliam zai a ngai leh ta zawk a ni.

Juventus midfielder hlui Pogba chuan, "Engkim a kaltluang vek e," tiin hlawhtling taka an zai thu a sawi. A hliam vang hian chawlhkar li chhung vel chu a chawlh chhunzawm leh a ngaih hmel.

France tana World Cup chawi tawh Pogba hi Old Trafford chhuahsan tur angin thawm a awm deuh reng. Mahse, United manager Ole Gunnar Solskjaer chuan December thla khan a player hi thlasik bazar laia an chhuah tir loh tur thu a lo sawi tawh.