African player zingah Mane a thiam ber

Liverpool forward Sadio Mane chu  Confederation of African Football's (CAF) Player of the Year atana thlan a ni a, Senegalese forward hian he chawimawina dawng tur hian Liverpool tana a khelhpui Egypt forward Mohamed Salah leh Manchester City-a Algerian winger Riyad Mahrez te a khum a ni. 

Kum 27 mi Mane hi season hmasa khan Reds-in Champions League nomawi an chawi theih nan a thawhhlawk hle a, goal khung pawh uar viauin inelna hrang hrangah season hmasa khan ram leh club tan goal 30 a khung. 

Tun season-ah pawh Mane hian chawlh hahdam mai a la tum lo tih pholangin Reds tan match 28-ah goal 15 a khung tling leh der tawh a, UEFA Super Cup leh Club World Cup nomawi a chawi leh der tawh. 

Mane chuan, "He chawimawina ka dawng thei hi ka inchhuangin ka lawm takzet a, football hi ka nitin hna a nih avangin nuam ka ti em em a ni. "Ka chhungte, ram tana ka khelhpui, staff, federation leh Liverpool Football Club chungah lawmthu ka sawi a, ka tan chuan ni chhinchhiah tlak duhawm tak a ni," a ti. 

Hurghada, Egypt-a award semnaah hian kum hnih a zawna chawimawina lo dawng tawh Salah leh City forward  Mahrez hmel hmuh tur a awm lo. Nigeria leh Barcelona forward Asisat Oshoala chu African Women's Player of the Year atan thlan a ni a, kum 21 mi Morocco right-back Achraf Hakimi (Borussia Dortmund) chu Youth Player of the Year award pek a ni bawk. 2019 Women's World Cup-a last 16-a England ngam lotu Cameroon chu African Women's National Team of the Year atan thlan an ni a, Africa Cup of Nations champion Algeria chuan mipa chawimawina an dawng bawk.