Nadal awmna Spain an tlang

ATP Cup khelh mekah Rafael Nadal chuan an ram Spain chu quarterfinal a hruai thleng, world number 1 hian tun inelna bika singles match a khelh hoah hnehna a la chang vek.

Nimin khan Spain hian Japan 2-0 in an hneh. Spain tan Robert Bautista Agut chuan match hmasa berah Go Soeda 6-2, 6-4 in a hneh a, inkhel pahnihnaah Nadal chuan harsa takin Yoshihito Nishioka chu 7-6 (7-4), 6-4 in a hneh.

World number 72 Nishioka lakah Nadal a khel ṭha tawk lo. Spain tlangval hian vawi 19 ngawt unforced errors a nei a, set hmasa zawkah chauh pawh a service vawi hnih a hloh. Mahse, a tawnhriat ngah tawh chawr ṭangkaiin hnehna a chang hram.

Grand Slam vawi 19 champion tawh Nadal chuan, "Boruak lum leh rit tak hnuaia inkhel kan ni a, a awlsam lo a ni," a ti. Tournament khelhna hmun Perth khawpui hi Australia ram kangin boruak a tih lum zinga mi a ni.