A hun pangngaiah Australian Open

Ram kang vangin Australia ram a buai mek a, harsatna hrang hrang thleng mek karah Australian Open chu a hun pangngaiah khelh theih beisei a ni - inelna hi January 20 aṭangin Melbourne Park-ah khelh tur 

a ni ang.

Australia ram hmun tam takah ram a kang a, meikhu a tamin khawpui ṭhenkhat chu a bawh buai phak hle. Meikhuin a tih buai zingah Melbourne pawh a tel, world number 2 leh champion lai ni bawk Novak Djokovic chuan inelna hi sawn hla se a duh thu a lo sawi hial tawh.

Tournament director Craig Tiley chuan, "Boruak hi a ṭha lam zawngin a kal zel a, kan duh leh beisei angin Australian Open chu a hunah tak kan khelh theih ngei a rinawm. Player, mipui leh staff lamin hriselna an neih theih chu kan duhthusam leh ngaih pawimawh ber a ni.

"Kan dinhmun hi a ṭha ber chu a ni rih lo tih chu hriat sa a ni. Mahse, hmun ṭhenkhata boruak a chhiat nasat ang em em chuan inelna tur hmunah hian a chhe lo deuh a, harsatna lian tham awm loa khelh theih ngei kan inbeisei," tiin a sawi.

Tun kar chhung hian Australia rama khawpui pathum Sydney, Brisbane leh Perth-ah te ATP Cup khelh mek a ni a, hengah te hian boruak chhia vanga buaina a awm loh avangin Australian Open pawh an khelh theih a rinawm.

Tennis season khatah hian Grand Slam pali a awm ṭhin a, hard court-a khelh ṭhin Australian Open hi a hmasa ber a ni. A hnu lamah French Open, Wimbledon leh US Open te khelh chhunzawm leh a ni ang.