Chelsea-in sum hloh hnem A pawi ber chu coach ban hrat!

Premier League club Chelsea chuan season liam taah khan pound maktaduai 96.6 ngawt an hloh a, heti chung hian club neitu Roman Abramovich chuan a mimal sum aṭangin pound maktaduai 247 a pe zawk!

Chelsea hian coach ban an chin avangin zângnadawmnaah sum an inseng hnem a, chutihrual chuan player hlawh tam leh squad thuam chak nana sum sen hnem te chu a tel tho bawk. Blues hian 2017-18 season-ah khan league lamah pangana dinhmun an hauh hram avangin Champions League an khel thei lo a, hei hian nasa takin an sum lakluh leh leiba neih kawngah a nghawng tih hriat tel a ṭha. 

Chelsea hian July 2018-a an manager Antonio Conte leh a thachhang dawltute an ban khan zângnadawmna pound maktaduai 26.6 ngawt an theh chhuak a, coach thar duh luatah sum an seng hnem hle. 

Coach thlak chin lama hriat hlawh Abramovich hian kum 2004 khan Chelsea neitu nihna a nei ṭan a, London club a neih hnua coach a ban avanga Blues-in sum an sen zat chu pound maktaduai 90 a tling! Coach ban zingah hian a tam zawk chu coach langsar an ni miau a, an contract-ah an hamṭhatna a tel nasat avangin ban tawh thut pawhin sum a tam a, coach rilru na pawh a zia ta deuh. 

Chelsea-in season hmasaah Champions League khel phak lo mah se player hlawh lamah erawh an inren phah lo a, tun season-a an hlawh punna zat belhkhawm hi pound maktaduai 41 a tling. 

Nipui transfer laia hrem vanga bazar thei lo Blues hi 2018-19 season ṭan dawn khan an bazar nasa hle a, player langsar tak tak Kepa Arrizabalaga, Christian Pulisic, Mateo Kovacic leh Jorginho te ho an lei. Players lei nana Chelsea sum sen zat hi 2018-19 season khan  pound maktaduai 280.6 a tling a, sum inrenchem lam an la tih lutuk loh avangin pound maktaduai 96.6 ngawt an hloh hi thil mak niin a lang hran lo.