Sri Lanka lakah India chungnung

India cricket team chuan Sri Lanka lakah an chungnun zia lantir lehin wicket sarihin hnehna an chang a, an target run 143 chu hma taka umphakin ball vuak hmabak 15 la nei chungin an chak tlang.

Holkar Stadium, Indore-a T20 inkhelah India tana bul ṭantu Shikhar Dhawan leh K.L. Rahul te an khel ṭha, run 71 an thawk chhuak. Captain Virat Kohli (30*) leh Shreyas Iyer (34) te an khelh ṭhat bawk avangin hnehna chang tur hian harstana an tawk lo.

Sri Lanka tan Wanindu Hasaranga chu bowler che fuh ber a ni, ani hian over li a vawmah wicket hnih lain run 30 a pe. Mahse, a ṭhiante zingah amah thlawp zo an awm lo a, an target a san tawk loh bawk avangin an tlawm a ṭul.

India hian series-ah 1-0 in hma an hruai mek, three-match series an khelh tur zinga a hmasa ber chu Guwahati-ah ni mah se khelmual a hnawn nasat avangin khelh theih a ni lo. January 10, Zirtawpni hian Pune-ah an inhmachhawn leh dawn a ni.