Old Trafford-ah Man City an chungnung

Carabao Cup champion lai Manchester City chuan semifinal first leg-ah Manchester United 3-1 in an sawp a, Old Trafford-ah mikhual team hi kawng tin rengin an chungnung. League Cup semifinal second leg hi January 29, Nilaini zan hian Etihad Stadium-ah khelh a ni ang.

Thawhṭanni zan inkhelah Pep Guardiola hote tan Bernardo Silva leh Riyad Mahrez ten an khung hnuin Andreas Pereira-a'n an lamah a tilut a, halftime-ah 3-0 a ni. Second half-ah mualneitu tan Marcus Rashford-a'n goal a khung a, hei chauh hi United ṭantute tan lawmna tur a awm.

Pep Guardiola-a'n bench-ah Sergio Aguero leh Gabriel Jesus te a dah avangin bul ṭantu zingah striker tiha chhal tur an awm lo a, 4-4-2 hmanga inremin midfielder pahnih Bernardo Silva leh Kevin de Bruyne te chu tlarhmaah 

an awm.

Ṭan phat aṭangin United-in mikhual team ball in pass an thlir a, Pep Guardiola-a'n an hmelma team lakah mualpho nawn a tum lo. Ole Gunnar Solskjaer hoten counter attack hmangin December thla khan Etihad Stadium an luhchhuah a, tun ṭumah erawh Man City-in hmun awl reng an pe lo.

Minute 17-naah Bernardo Silva chuan box pawnah petna khawp insiamin ṭha zetin a pet a, keeper David de Gea-a tan dah theih a ni lo. Goal luh hnuah pawh City bawk an chungnung a, Bernardo 'killer pass' changtu Riyad Mahrez-a'n keeper De Gea bumin minute 33-naah a khung.

Man City thiamzia a lang chhunzawm zel a, counter attack hmanga minute 38-naah United vaw letin football hmuhnawm bik an pho chhuak. A hmawr bawkna takah United midfielder Andreas Pereira-a'n an lamah ti lut mah se hemi hmaa City passing leh Kevin de Bruyne-a'n amah vengtu Phil Jones a chhaih phar dan chu ṭhangtharte inzirna tura dah 

ṭhat tlak a tling.

League Cup-ah away goal rule a awm lo a, inkhel pahnih belhkhawma an inhnehtawk a nih chuan extra time khelh a ni dawn. City-in Old Trafford-ah goal thum zet an khung avangin away goal rule awm lo hi United tan beiseina siamtu a ni thei ang.

Man City inthlahdah zeuh United-in an chhawr ṭangkai a, Mason Greenwood ball pek chu Marcus Rashford-a'n minute 70-naah a pet goal a, hei hian United tan beiseina a siam belhchhah dawn. Amaherawhchu minute 90 chhung an khelh dan thlir chuan Etihad Stadium-ah United-in goal engzat nge an phur belh ang tih chu zawhna awm thei zawk tak a ni.

Manchester City boss Pep Guardiola chuan, "Kan intawn hnuhnun ber khan ball kan hloh chiah khan inkhel kan thunun thei tawh ṭhin lo a, tun ṭumah erawh kan ti ṭha hle. Chutihrualin kan ball hlohna hmun a pawi a, kan khingpui hi kan theihngilh tur a ni lo. Old Trafford-ah hnehna kan chang a, result ṭha a ni," tiin a sawi.

Spanish manager Pep chuan sawi chhunzawmin, "A la tawp lo. Match khat khelh tur a la awm a, Manchester United hi an la tho leh thei a ni. Nikum pawh khan Paris St-Germain lakah an tho chhuak thei a, an club hian sulhnu 

ṭha tak an neih miau avangin engmah a la chiang lo," tiin a ṭawng pawr duh lo.

Manchester United manager Ole Gunnar Solskjaer chuan, "Goal khatna aṭang khan kan buai tawh a, a tir minute 15 kha kan khelh chhiat ber ṭum a ni. Second half-ah insiamṭha hret mah ila first half-ah pawi tur ang a pawi tawh. An khelh dan hmang kha kan dawl zo lo a, khatianga an khelh ṭhat ṭum kha chuan Chelsea pawh 5-0 in nikum khan an hneh," tiin team ṭha bik laka an tlawm thu a sawi.

]

Kum 2020-ah Manchester United-in chak an la nei lo a, Solskjaer hote hian Man City an hneh loh hma hian Arsenal hneh loin Wolverhampton Wanderers nen an inhnehtawk leh bawk.