Swiss club lian FC Basel chuan Indian football an luhchilh dawn a, I League club Chennai City FC-ah 26% share an lei.
FC Basel leh Chennai City hian club pahnih inremna thu hi nimin khan New Delhi khawpuiah an puang a, he hunah hian Chennai neitu pahnih Rohit Ramesh leh R Krishnakumar bakah Basel president Bernhard Burgener leh CEO Roland Heri te an tel.
Swiss Super League club-in Chennai-ah neitu nihna an neih ve tak avangin tun hi European club-in Indian club-a share an neihna hmasa ber a ni nghal a ni.
Thawhdunna chu
Chennai City FC hi an club hming ang lo takin Coimbatore khawpuia innghat an ni a, he khawpuiah hian FC Basel chuan football academy ṭha tak an din dawn.
He football academy-ah hian naupangte chu a thlawn vekin hostel-ah dah an ni ang a, kum 10-18 inkar chin a awm theih ang. Football piah lamah lehkha zir tel tir tur an ni dawn a, engkim hi a thlawn vek tur a ni.
CFC neitu Rohit Ramesh chuan, "Inremna tam tak zingah FC Basel hian khelmual chhung bakah club hmun hma leh thil tam tak inhrilh hriatna kawngah min pui dawn a ni," a ti.
Eng nge an sawi?
Rohit Ramesh chuan, "Engkim inhrethiam tawn takin inremna kan nei. European football club lian, sulhnu nei lian tak nena kan thawkdun thei hi kan tan chuan thu lawmawm tak a ni," tiin a sawi.
FC Basel president Burgenersaid chuan, "Indian football leh Chennai City tan mai a ni lo a, FC Basel tan pawh vawiin hi hun lawmawm a ni. Asian Cup khelh zawh tak aṭang khan India hian talent a nei tih kan hria a, he hmasawnnaa tel ve hi kan duh a ni," a ti.
Chennai City hian I League-a an season thumna hmang mekin Singaporean coach Akbar Nawas enkawlna hnuaiah an khel mek a, I League-ah champion thei dinhmunah an ding mek.
Basel bihchianna
Swiss Super League club hi Mohamed Salah, Xherdan Shaqiri leh Ivan Rakitic ten hriat an hlawh ṭanna club an ni a, European football-ah chuan an hming hian hriat a hlawh hle.
An ram league-ah vawi 20 champion tawhin Swiss Cup ringawt pawh vawi 12 an chawi tawh a, tun hnaiah Champions League an khelh ṭhin avangin hriat an hlawh hle.
Champions League-a an thlen san ber chu 1974 kha niin quarterfinal an thleng a, tun hnaiah 2011-12, 2014-15 leh 2017-18 season-ah te last 16 an lut a, 2012-13 season khan Europa League-ah semifinal an lut a, 2013-14 khan quarterfinal an thleng bawk.
