Aizawl FC Under 18 an chak lo

Football hmanga India ram rawlthar ṭhate inelna Hero Elite League-ah Aizawl FC Under 18 chuan nimin khan FC Pune City chu 2-0 in an hneh lo a, final an thleng zo lo. Pune City hian FC Goa hnehtu Minerva Punjab nen nomawi an inchuh ang.

Nagoa Panchayat Ground, Goa-ah Pune City-in minute 22-naah Nikhil Prabhu hmangin hma an hruai a, Aizawl FC-in minute 86-naah penalty hmangin siphurh sut theihna hun ṭha an nei a, R Lalthanmawia'n a penalty hlawhchhuah chu goal-ah a chantir thei lo.

Hun tawp lamah Aizawl FC U18 an chesual a, injury time minute hnihnaah keeper Vannunmawia chu hnawhchhuah a ni a, minute hnih hnuah substitute Akhil Rawat chuan Pune goal hnihna a khung. Pune City tan hian Mizo rawlthar Mark Zothanpuia, Laldawngkima leh F. Malsawmtluanga ten inkhel bul an ṭan a, Lalrinliana Hnamte chu bench-ah a awm bawk.

Semifinal hmasa zawkah Minerva Punjab chuan minute 14-na leka Makan Winkle Chothe goal hmangin FC Goa an hneh a, team pahnih squad-ah Mizo rawlthar an awm lo.