Pro Fight a hmuhnawm nghal

Tata Motors Yodha 4x5 Pickup LPS Pro Fight chu Thawhlehni zan khan khelh ṭan a ni a, a ṭan zan hian inhnek 11 awmin - knock out pakhat bakah technical knockout ṭum ruk kan hmu nghal; tualchhung boxing boruak a sang nghal hle.

R. Dengṭhuama Indoor Stadium, Mualpuiah hian lightfly, bantam leh fly huangah inelna neih niin, zanin hian heng category pathumah hian inelna neih chhunzawm a ni dawn a, inhnek 12 a awm leh ang.

A ṭan zana inkhel hmuhnawm bera chhal ngamah F. Lalnunsanga chuan round thumna, second 45-naah Nelson HC Lalnunmawia chu technical knockout hmangin a hneh. Saithah tlangval Nunsanga hian round hnihnaah a vei leh ding hmang tawnin vawi ruk zet hnek zawn mah se Nelson a tlawm bik lo a, round thumnaah erawh referee C. Vanlalchhuanga'n inhnek a tih tawp ngai khawpin a hnek fuh leh bawk.

Lightfly inhnek dangah Lalrindika (Khawlailung), Vardingliana (Chamring) leh PL Lalchhanchhuaha (Saichal) te chuan technical knockout hmangin an khingpui ṭheuh an hneh bawk. Sawleng tlangval Thangkhanmunga erawhin minute khat leh second 25 chhung lekin Zuangtui boxer Laldinpuia chu a knock out a ni.

Bantam huangah boxer an inrualkhat hle a, hnehna chang zingah pawh inchhuang thei tur khawpa chungnung fal hmuh tur an awm bik lo. Vanlalruatpuia'n Lalhnehzova lakah a tir aṭanga inhnek thunun tluanin hnehna a chang.

Isak Rosangpuia'n Lalremthanga lakah technical knockout hmanga hnehna a chan laiin, Mamit tlangval Zoremsanga Royte chuan Nursery Veng boxer Zidane Ramdinsanga chu unanimous decision in a hneh. Lalruatfela (Edenthar) pawhin technical knock out hmangin Lalchhandama (Nursery) a hneh, round hnihna an khel ṭan dawn chauhah Nursery Veng boxer hi a inhnukdawk.

Inhnek pahnih chiah a awm a, Lalhruaisanga leh Lalhmachhuana te a tir aṭangin an inhnek nghal buan buan a, an fit tawk loh avangin round hnuhnungah an inhnek a hmuhnawm loh - Ramhlun North boxer Hruaisanga hian unanimous decision in hnehna a chang. 

Tlangnuam tlangval PC Rosangpuia'n mahni inveng tak chungin thahrui ngah zawk David Lalremruata (Zemabawk North) lakah unanimous decision hmangin hnehna a chang hram.