Santosh Trophy Qualifying Round Mizoram tan kan khel tih hriat a ngai - Sanga, coach

India rama state leh state football hmanga inelna sang ber National Football Championship for Santosh Trophy khel tur zawnna NorthEast Zone Qualifying round chu Mizoramah nghah a ni dawn. Inelna hi February 11-16, 2019 chhung hian neih a ni dawn a, Mizoram hi group A-ah Meghalaya leh Tripura nen an awm.

Mizoram coach Lalsangzuala Hmar chuan, "Kum hnih liam ta aṭang khan Mizoram team hi ka enkawl a, kan ram tan ka theihna zawng zawng ka hlan. Semifinal-ah kan vanduai a, nikumah pawh semifinal-ah tho kan vanduai nawn. Kan squad thlirin team ṭha tak kan ni a, a pawimawh ber chu Mizoram tan kan khel tih kan hriat a ngai. Kan theihna zawng zawng kan ram tan hian hlan a ṭul a ni," tiin Vanglaini a hrilh.

Mizoram hian nikum khan semifinal-ah Kerala 1-0 in an hneh lo a, kum 2017 khan West Bengal nen goal awm loa an inhnehtawk hnuin penalty-ah an chak lo a, hemi ṭum hian Sanga hian Mizoram team hi a enkawl ve ve.

January thla tir lam khan Mizoram chuan probables squad an puang tawh a, tun ṭumah hian qualifying round-a khel tur player 20 an tichiang. Final round an thleng thei a nih chuan Mizoram hian squad an siksawi thei dawn a, amaherawhchu a pawimawh hmasa ber chu qualifying round paltlang a ni.

Mizoram Football Association hi India rama sports bungraw siamtu lar Nivia in an sponsor a, MFA Futsal League Season 2 Kick Off zan khan Mizoram Jersey hi tlangzarh a ni a, jersey tharah hian Mizoram flag a chuang kalh a, lei theihin a awm thuai ang.