German Cup aṭangin Dortmund an tla

Borussia Dortmund chuan hun tawp dawna goal an chhuah avangin Werder Bremen nen 3-3 in an inhnehtawk a, penalty shootout neih a hnih hnuah Bundesliga hmahruaitu hi 4-2 a an chak loh avangin German Cup last 16-ah hnawh chhuah an ni.

Thawhlehni zan Signal Iduna Park-a inkhelah entu 80,000 chuang zet an pungkhawm a,ṭum hnih ngawt an hnufual hnua tho chhuak thei Werder Bremen an huaisen, forward Max Kruse chuan chakna goal a khung.

Inkhel ṭan aṭanga minute ngana lekah Bremen midfielder Milot Rashica chuan goal hmahruai a khung a, an mualah Dortmund an inring hman lo. Mario Gotze-a'n Christian Pulisic hnen aṭanga a ball hmuh hmangin sut zui nghal theihna hun nei mah se goal ban hrulah a liam hlauh.

Dortmund lamin siphurh an sut mai thei lo, chawlhlawk hma chiahin Marco Reus chuan freekick aṭangin mawi zetin a khung a, minute 90 chhung goal a luh belh tawh loh avangin hun pek belh khelh a ngai.

Extra time khelh a ni a, season thar aṭanga Chelsea player ni tur Christian Pulisic-a'n solo goal turu hmangin Dortmund hma a hruaipui, mahse Blues player hlui kum 40 mi Claudio Pizarro hmangin Bremen lamin an chhanglet.

Dortmund-in Achraf Hakimi hmangin a vawi hnih nan hma hruai nawn mah se hun pek belh a zawh hma chiahin Martin Harnik-a'n a tauhlut ve hlauh a, extra time zawh hnuah pawh 3-3 in an inhnehtawk.

Penalty shootout-ah Dort­mund player Paco Alcacer leh Max Philipp ten an hlah a, league bakah German Cup nomawi an beiseina a thamral. Bremen erawh kum 10 hnua a vawi khat nan champion leh an beisei, an champion hnuhnung bera chakna goal khungtu chu Mesut Ozil a ni.

Borussia Dortmund tan chak loh hi a pawi a, hliam vanga captain Marco Reus an chan zui bawk avangin coach Lucien Favre tan ngaihtuah a ti thui ang; Germany international thlaktu Alcacer-a'n penalty a hlawh bawk a ni.

Bundesliga hmahruaitu hian kar tawp league match-ah Hoffenheim an hmachhawn dawn a, tun thla chhungin Champions League last 16-ah Tottenham an hmachhawn dawn bawk avangin player pawimawh Reus inhliam hi a pawi thei.

Dortmund coach Favre chuan, "Kar tawpah a inkhel thei dawn em tih ka chiang lo, hun rei vak lo chhung chu a dinhmun hi kan ngaihchan a ngai dawn, hliam na tak a nih loh hram kan beisei," tiin a sawi.

Kum 29 mi Reus hi hliam vangin a buai fo tawh a, tun season erawh a khel tluang viau. Inelna hrang hrangah match 24 aṭangin goal 14 a khung tawh a, league bikah goal 11 a khung tawh avangin player pawimawh berte zinga mi a ni.