City hmachhawn tur i hriat ngai loh Newport!

English football division sang zawng aṭanga teh chuan Newport chu fourth division club an ni a, Premier League champion Manchester City nena an inkar chu zau tak a ni. 

Mahse, he club hian Cup competition ngaihnawm chhan a takin an pholang a, FA Cup fifth round-a Manchester City hmachhawn turin an inpet tling!

Thawhlehni zan khan League Two club Newport hian an mi­khual Middlesbrough chu 2-0 in an hneh a, FA Cup fourth round replay-ah Championship club hneh chungin hmalam an pan zel. 

FA Cup fourth round replay inkhel ngaihven hlawh zual zingah Wolverhampton Wan­derers chuan hnehna an chang ve bawk a, League One club Shrewsbury chu 3-2 in an hneh. 

Newport leh Boro inkar hi khap dawn ila, a zau viau ang tih a chiang reng. Mahse, football-ah chuan thleng thei lo a awm lo tih a takin lantir a ni leh ta a, Boro-in club tenau an ngam tlat lo. 

Team pahnih intawn hmasak zawkah Newport hi an lo vannei tawh a, 1-0 a an hnufual reng hnuah FA Cup an mangṭha mai dawn niin a lang - mahse injury time-ah Matthew Dolan chuan Newport tan si phurh a sut a, 1-1 a inhnehtawk zuiin replay hi khelh a ngaih phah. 

Inkhel hmasa zawka New­­port tana injury time-a goal khungtu Dolan hi Boro academy chhuak a ni a, Premier League club hlui tan hian first team match pawh khel loin a chhuak a, a puitlin meuh chuan amah siam liantu veltu a ni. 

Replay-ah pawh hian goal a lut lawk lo. Mahse, second half-ah Robbie Willmott leh Padraig Amond ten goal khungin Boro-in a chhanletna tur an nei lo a, League Two club vangin FA Cup an mangṭha.

County hian Championship club an hnawt chhuak hi tam takin mak an ti - mahse an result hmasa en chuan mak tia sawi chiam tur niin a lang chuang lo. 

Premier League club Lei­cester City chu third round-ah khan 2-1 in an lo hneh tawh a, hei vang hian Boro pawh hi an ngam phah niin a lang - FA Cup fifth round an khelh dawn vangin pound maktaduai khat velin an hausak belh ang. 

Kum 1989-a din thar leh chauh club, fourth division-a khel mek team tan chuan pound maktaduai khata hausak belh hi tam tham tak a ni a, City tan erawh Sergio Aguero thla khat hlawh vel lek a ni thung!

Newport fan-ten an beisei, an beisei ngam si loh result an hmu a, inkhelh zawhah, "Manchester City, In tan kan lokal e," tiin an zai rual a, City an hmachhawn thei tur chu an hlim hle. 

Newport County-in hneh­na an chang a, a ṭhianten Cham­pionship club meuh hneha, Manchester City an hmachhawn tur an lawm laiin goalkeeper Joe Day erawh a ṭhiante zingah a awm hman lo. 

Kum 28 mi goalkeeper hi a nupui a rai a, inkhelh zawh veleh manager Michael Flynn hnenah tlanin, "Coach ka lawm takzet e, mahse ka nupui awmna hospital lamah ka kal thei ang em?" tiin a dil!

Joe Day hian inkhelh chhung zawngin amah tibuaitu a awm a duh lo a, a phone pawh a switch off thlap - inkhelh zawh hian a nupuiin nau a vei mek tih hriain a tlan nghal a, fanu phir an nei. 

Newport coach Michael Flynn chuan, "Joe Day profes­sional zia hi en teh u, inkhelh chhung zawng khan a phone a switch off a, a hnuah kal min rawn dil chauh a ni," tiin a player inpekna a fak. 

Premier League club Wol­ves-in FA Cup fourth round match hmasa zawkah League One club Shrewsbury chu 2-2 in an inhnehtawkpui a, club pahnih dinhmun enin Wolves tan result lawmawm a ni lo. 

Replay khelh hnuah pawh Wolves hian 3-2 in hnehna an chang hram a, Matt Doherty chuan goal hnih khungin Ivan Cavaleiro chuan goal khat a thawh ve bawk - Wolves hi 2-1 in an hnufual hman hial. 

Minute hnihna lekah Doher­ty hian goal hmahruai khung mah se League One club hian James Bolton leh Josh Laurent hmangin an chhanglet a, Wolves an chi ai hman hle - mahse Doherty bawkin an si phurh a sut hnuah Cavaleiro chuan goal khat a khung leh a, 3-2 in an chak.

 

Wolves manager Nuno Es­pirito Santo chuan, "Kan khelh dan en chuan ka lawm lo a, mahse fifth round kan luh avang erawhin ka lawm thung," a ti a, a naute khelh danah a lawm lo.