A chung berah Real Kashmir

Real Kashmir chuan nimin tlai khan I League-ah Gokulam Kerala chu 1-0 in an hneh a, table chung berah invawrh chhoin hmahruaitu din­hmun an luah zui. 

Kashmir club ṭha hian Chennai City chu point hnihin an tlan pel a, mahse South Indian club hian anni aiin match hnihin an khel tlem zawk tih erawh hriat tel a ṭha. 

Real Kashmir tan hian Gnohere Krizo chuan mi­nu­te 51-naah he in­khela goal awmchhun hi a khung a, Gokulam hian a chhanletna tur an neih theih loh avangin an tlawm.

Thawhlehni zan khan Shillong Lajong chuan champion inbeisei Churchill Brothers an barakhaih a, 3-2 in an hneh - tun season-a vawi thum an chakna ve chiah a ni a, table mawngphah erawh an la chhuahsan thei lo!

Meghalaya club tan hian Samuel Kynshi chuan first half chhungin goal hnih a khung a, Goan club hian Willis Plaza leh Anthony Wolfe hmangin chhanglet mah se Mahesh Singh chuan minute 83-naah Lajong chakna a khung a ni. 

Lajong tan hian captain Samuel Lalmuanpuia chu bench aṭanga luhtir a ni a, F. Lalrohlua'n inkhel bul a ṭan bawk.

Zaninah I League in­khel pakhat a awm dawn a, East Bengal chuan vawiin tlai dar 5:00-ah Neroca an mikhual ang.