James ropui niah Lakers chak lo

LeBron James chu NBA player zingah point 32,000 score tling thei pangana a ni ta a, mahse mellung pawimawh a phun niah hian basketball a khelh ve tawh china a chak loh chian ber ṭum a tawng thung.

Nimin zing NBA regular season inkhelah James hian Los Angeles Lakers tan point 18 score sak mah se Indiana Pacers lakah 136-94 in an chak lo. James hian tun hma lam kum 16 chhung khan point 36 chunga chak lohna a la tawng ngai lo a ni.

Lakers hian tun regular season bikah vawi 27 an chak lohna an tawng a, an tlawm zat chiah hi hnehna an chang tawh bawk - Western Conference lamah 10-na niin, playoff khel phak chinah an awm pha rih lo.

Lakers coach Luke Walton chuan, "Basket venhim kawngah nasa taka hma kan sawn a ngai. James hian engtik niah emaw chuan mellung pawimawh a la phun dawn tih chu ka hria, hun hlimawm a hman nia hetiang result kan tawn pui hi a pawi ka tih pui hle," tiin a sawi.

Kum 34 mi James hian point score hnem lamah Chicago Bulls legend Michael Jordan chu point 300 in a phak lo mek a, a chungah hian Kobe Bryant (33643 points), Karl Malone (36928) leh Kareem Abdul-Jabbar (38387) te an la awm.