Qatar Open khel lo tur Osaka

Tennis world number 1 Naomi Osaka chu a hnungzâng na vangin a inkhel thei rih dawn lo a, kar leha khelh tur Qatar Open aṭangin a inhnukdawk tih tournament buatsaihtute chuan an puang.

Kum 21 mi Osaka hi a hliam nat zawng sawi chian chiah a ni lo a, nikum October thla khan he a hliam ngai vang bawk hian Hong Kong Open aṭangin a inhnukdawk tawh bawk.

Japanese nula Osaka chuan, "Doha-a ka kal thei lo tur hi pawi ka ti takzet, min ṭantu tam tak awmna hmun a ni tih ka hria. An hmuh laia tennis hmuhnawm ka lantir thei lo tur hi a pawi, season lehpekah chuan ka inlan theih ka beisei. Player inlan tur zawng zawngte ṭha taka inlan turin duhsakna ka hlan vek," tiin a sawi.

Qatar Open aṭang hian world number 3 leh French Open champion ni bawk Simona Halep pawh a lo inhnukdawk tawh a, anni pahnih inlan thei lo tur hi tournament buatsaihtu leh fans lam tan chuan channa nasa tak a tling ang.

Tun season Grand Slam hmasa ber Australian Open-ah khan Osaka hian Petra Kvitova hnehin a vawi khat nan a champion a, season hmasa khan US Open nomawi a chawi tawh bawk avangin major tournament hnuhnung pahnihah a champion.