Premier League-ah champion thei panga?

Manchester City manager Pep Guardiola chuan Premier League champion tur chuan season tawp ni emaw a hma round-ah chauh a hriat theih tur thu a sawi a, champion thei panga an awm thu a sawi bawk.

Nizan khan Manchester City-in Goodison Park-ah Everton an hmachhawn a, result kan hre hman lo. Premier League champion lai manager Guardiola pawh a ṭawng huai ngam tawh lo. 

Spanish manager chuan, "Point 39 hmuh tur a la awm a, point kua emaw 10 a inthlauhna hi chu inlehthal theih a la  ni. Tottenham hi champion thei zing aṭangin ka dah bo ngai lo. United pawhin kartinin nomawi an rawn hnaih ve zel a, champion tura inum zingah an rawn tel thuai ang. Table kan thlirin a chung pathum chauh kan thlir ṭhin a, Chelsea hi chak zawn se champion thei zingah an rawn tel ang," tiin pressure insiam loh nan champion lo thei an nih thu a sawi.

Liverpool-in January 3-a Manchester City an hmachhawn hma khan point sarihin an sang fal a, Pep-a hoten hnehna an chan avangin Reds sanna chu point li a ni chiah. Nizana City an chak leh a nih phei chuan goal difference hmangin Premier League champion lai hi hmahruaitu an ni dawn tihna a ni.

Pep Guardiola chuan sawi chhunzawmin, "Nomawi inum chhoh lai hian talbuai loh kan tum a, chutihrualin club tenau zawka ngaihin club lian an hneh ṭum hi chu a thleng dawn. Champion beiseiawm zinga tel pha lo hian champion thei team hi an tibuai pha a ni," tiin Premier League harsat zia a sawi.

Manchester City hian Pathianniah Chelsea nen League Cup nomawi an inchuh lehnghal dawn, FA Cup-ah erawh an khingpui ziaawmin Newport County nen February 16-ah an inhmachhawn ang a, hemi zawh hian Champions League-ah Schalke an hmachhawn ang.

City elpui ber Liverpool erawh League Cup leh FA Cup-ah khelh tur an nei tawh lo a, tun Inrinni hian Anfield-ah Bournemouth an mikhual ang. Reds hian ni 11 zet an chawlh hnuah an mualah tho Bayern Munich an mikhual dawn a, League Cup leh FA Cup-a an tlak hma avangin an elpui Man City aiin an fixtures a awlsam zawk.