Mizoram sorkar chuan November 26, 2024 khan district pahniha Superintendent of Police (SP) a sîksawi a; sîksawi zinga mi, Lunglei SP chungchanga sorkar thupek (notification) chu Lungleia pawl hrang hrangin an dodal a, sût turin sorkar an ngen. Hetih lai hian, sorkar chuan Lunglei SP ni lai chu sawn chhuah loh turin a ti.

DPAR-in November 26, 2024-a notification a chhuaha a lan danin, Siaha SP ni lai Shivam Siddharth, IPS chu Lunglei SP ni tura tih a ni a, Lunglei SP ni lai J Lalmuankima awmna tur erawh tarlan a ni lo. Hnahthial SP ni lai Manny Bhushan Singh, IPS chu Siaha SP tura tih a ni.

Thu dawn danin, Lunglei SP ni tura tih Shivam Siddharth hi Lunglei DC hna November 22, 2024-a zawm thar Navneet Mann, IAS pasal a ni.

Lunglei SP J Lalmuankima thlak hi Lungleia YMA Sub-Headquarters, MZP leh VDP Coordination chuan an duh lo a, notification sût turin Mizoram sorkar an phût.

YMA Sub-Hqrs, Lunglei chuan nimin khan Emergency Meeting an nei a, thuchhuah siam nghalin, Lunglei SP thar tur chungchanga notification chhuah chu November 28, 2024 (vawiin) tlai dar 4 ral hmaa sût turin sorkar an phût a, "SP transfer order hi 28.11.2024 tlai dar 4 ral hma ngeia sût turin thuneitute kan ngen a, kan ngenna hi a hlawhtlin loh chuan a hlawhtlin nana hmalak dan tur zau zawka ngaihtuah leh ni se kan ti," an ti.

Hetih lai hian, DPAR chuan Siaha SP ni lai Shivam Siddarth, IPS, Lunglei SP ni tura notification chhuah tawh chu nimin khan sûtin, Hnahthial SP ni turin a sawn a; Lunglei SP ni lai J Lalmuankima chuan a hna ngai a chelh ang.

Home department aṭanga thu dawn danin, Lunglei SP thar tur dahna order chhuah ni tawh mah se, SP ni lai J Lalmuankima sawnna order tihchhuah a la ni lo a, chuvang chuan J Lalmuankima transfer order sût tur a awm lo a ni.

Lunglei SP thar dahna tur hriattirna chhuah tawh chung­changah hian Lunglei YMA chuan, tun hnaiah Lunglei district-a thuneitu sangte sawn chhuah an ni a, a thlaktute atana dahte chu hnam dang an nih hlawm avangin mipui an lungawi lo niin an tarlang. "Thlaktu atan hnam dang vek dah an ni hi lungawithlak loh kan ti a, Lunglei SP tura hnam dang sorkarin a dahna order hi sût turin kan ngen a ni," an ti.

YMA tarlan danin, DIG (Southern Range) February 2025-a pension tur chu hnam dangin thlak a ni a, Lunglei DC chu thla 4 awrh a awm hman tihah sawnin, a aiah hnam dang dah a ni. DC kal chhuak ta chu sawn lo turin sorkarah an ngen a, mahse, an hlawhtling lo. November 26, 2024-a order chhuakah Lunglei SP atan hnam dang bawk dah leh a ni.

Lunglei Sub-Hqrs YMA meeting thuchhuak hi Home Minister leh DPAR Minister hnena thlen turin secretary Zothanzuala Hnamte, treasurer K Vanlalhruaia leh SEC member pahnihte'n nimin khan Aizawl an pan nghal a ni.

MZP Headquarters, Lunglei pawhin nimin khan Extended OB meeting neiin, Lunglei SP chungchang an ngaihtuah a; thuchhuah siamin, Lunglei SP chungchangah Lunglei mipui duh dan anga sorkarin November 26, 2024-a notification a chhuah chu tidanglam turin thuneitute an ngen.

Lunglei MZP chuan, "Lunglei DC leh SP rawn dah tharte hi probationary service hmang zo hlim hlawl ve ve an ni a, an posting hmasa ber tura nupaa awm dun kher an tum avanga mi dang hna thawk ṭha lai leh Lunglei hmasawnna tur kawng hrang hranga ngaihtuahtute'n an tuar phah hi pawi kan tiin hriatthiam har kan ti hle," an ti.

Lungleia VDP (village defence party) intêlkhawm, VDP Coordination, Lunglei chuan Lunglei SP atan Shivam Siddharth dah a, SP ni mek J Lalmuankima sawn chhuah chu ṭha an tih loh thu an puang a; transfer notification sût turin na takin sorkar an ngen tih an sawi.

VDP Coordination chuan, J Lalmuankima chu Lunglei SP-ah thla 8 a awm chhungin ruihhlo donaah VDP-te nen an thawhhona a ṭhat thu leh an thawhho nasat thu te, a hmalakna avangin veng tam takah VDP din thar leh a nih thute an sawi bawk.