Oil depot neih thuai kan duh - Chief Minister

Chief minister Lalduhoma chu nimin khan a pisaah Indian Oil AOD, State Office-a executive director Rajesh Nambiar nen an inkâwm a, Mizoramin oil depot (tuialhthei dah khawlna lian) neih thuai an duh thu a hrilh.

CM Lalduhoma chuan, oil depot neih thuai an duh thu sawiin, "A hmun thlan tur pahnih kan chhawp che u hi thlang fel rang u la, hnathawh theih hun (working season) a inṭan tawh avangin hna ṭan thuai u la kan duh," a ti.

Rajesh Nambiar chuan, document an neih zawng zawng an headquarters-ah an thawn tawh tih sawiin, "Zawhna tlema zawng min rawn zawt leh mek. Rei lo têah kan thlan mai ka ring," a ti a; a hmun an tihchian chuan kum hnih chhunga an sak zawh theih a beisei thu a sawi.

Mualkhang Bottling Plant tharthawh tura hmalakna hrang hrang te, electric vehicle a pun zel avanga charging station eng emaw zat siam tura hma an lak mekte leh, Indian Oil Corporation-in CSR hmanga Mizorama hna an thawhte pawh Rjesh Nambiah chuan Chief Minister a hrilh.

IOC hian Mizoramah petrol pump 72 an nei mek a, electric charging station 20 siam tumin hma an la mek bawk. Mualkhang Bottling Station tharthawh turin tihchangtlun hna an thawk ṭan tawh a, a hungna tur siamtu tur thlanna atan tender an tichhuak mek a ni.