Material Recovery Facility Centre siamna turah thuthlung ziah a ni

Lungmuala bawlhhlawh sawngbawlna, Material Recovery Facility Centre siam turah nimin khan MINECO pêngṭhuamah Aizawl Municipal Corporation (AMC), Aizawl Smart City Ltd. leh NEPRA Resource Management ten inremna an ziak a; UDPA minister K Sapdanga'n bawlhhlawh paihna tur lirthei 20 a vailiam nghal.

Material Recovery Facility Centre siam leh bawlhhlawh paihna tur lirthei 20 buatsaih thar hi UDPA department, AMC leh Aizawl Smart City-te kalpui mek, 'Faina Hmathlir - Comprehensive Plan for Municipal Waste in Aizawl' hnuaia hmalakna a ni. Inremnaah hian AMC commissioner Joseph H Lalramsanga, Aizawl Smart City chief executive officer CC Lalchhuangkima, NEPRA co-founder leh CEO Sandeep Patel ten hming an ziak.

Inkhawm hi UDPA secretary Lalmalsawma Pachuau-in a kaihruai a; UDPA minister K Sapdanga chuan bawlhhlawh thliar hran leh paih chungchangah ṭan la thar zel turin Aizawla chhungkaw tin a ngen a, "Aizawl khawpui a fai loh hian AMC mawh a ni lo a, mipui chengte mawh a ni," a ti.

K Sapdanga chuan, mipuite'n khawpui an vawn fai theih dan tur an sawiho hnuah, Aizawl khawpui fai zawkna turin Smart City aṭangin bawlhhlawh paih lirthei ruahman a nih thu a sawi. Minister hian lirthei 20-te chu AMC kutah hlanin a vailiam a ni.

Material Recovery Facility Centre siam hna thawk turin Admedabad, Gujarad-a inkulh NEPRA Resource Management leh JN Buildcon, Aizawl te thlan an ni a, siamna tur sum Rs 25,17,16,180 chu Smart City aṭangin ruahman a ni. Ni khata bawlhhlawh ton 75 sawngbawl thei tura ruahman niin, inremna ziah aṭanga thla 12 chhunga siam zawh tur a ni.

Inremna ziahnaah hian Aizawl mayor Lalrinenga Sailo chuan, AMC-in bawlhhlawh an lak khawmna aṭangin local council chak leh chak lo te, veng changkang leh changkang lote a hriat theih hle tih a sawi a, "LC chak leh veng changkangah chuan ṭawih thei leh ṭawih thei lo an thliar vek ṭhin," a ti.

Lalrinenga Sailo chuan, "AMC-in kan tih chu bawlhhlawh lak khawm a ni a, bawhhlawh thliar hran erawh chu mipui chan a ni," a ti a; Aizawl khawpui faina tura sorkarin theitawp chhuaha a hmalaknate a hlawhtlin leh hlawhtlin loh chu mipui kutah a innghat tih a sawi.

Aizawl Smart City CEO CC Lalchhuangkima pawhin thu sawiin, October 11, 2024-a Faina Hmathlir ‘Comprehensive Plan for Municipal Waste in Aizawl’ hun an hman bawhzuiin Aizawla veng hrang hrangah waste segregation campaign kalpui a ni tawh tih a sawi a; bawlhhlawh paihna tur lirthei 20 chu ṭawih thei phur thei tur bika duan niin, tui pût thei lo a nih thu a sawi bawk.