ZPM hi a tla dawn chiang - Dr Thangtea

MNF senior vice president Dr R Lalthangliana chuan, ZPM sorkar chu rei lo tê atana lang ve zawk, tla leh nghal tur niin a sawi a; MNF chu ram leh hnam himna tura tlanchhe thiang lo an nih thu a sawi bawk.

MNF Gen.Hqrs-a organiser-te'n nimina Kelsiha political training leh advance christmas an hmannaah thu sawiin Dr R Lalthangliana chuan, "MNF hi kan ram, kan hnam himna turin kan tlanchhe ve thiang lo. Pathian leh kan ram tan titu kan ni a, he pawl hian Pathian dah hmasa chungin ram rawng a lo bâwl tawh ṭhin a, a kal zel dawn a ni," a ti.

ZPM kaihhruai sorkar chungchang sawiin R Lalthangliana chuan, "An sawi ang ni lo hlirin thil an ti a, an lakah mipui an beidawng ṭan dêr tawh. Sinlung Hills Council-ah kan tling a, ZPM tan chuan kun ngawih ngawihna tling a ni. ZPM hi a tla dawn chiang a, MNF lo chu ZPM thlaktu tur dang an awm lo tih hi a chiang," a ti a; ZPM sorkar hi rei lo tê atana lang ve zawk niin a sawi.

MNF treasurer Lalruatkima pawhin thu sawiin, "ZPM sorkar hian sawngthing, aieng, hmunphiah leh hmarcha lei turin an insawi a, an hlawhchham an ring nge, thlai thar hmaa inthlang hman turin VC/LC inthlan nasa takin an pawt hnai ta ringawt mai a ni," a ti.

Lalruatkima chuan, ZPM sorkarin Handholding hmangin ṭhalaite bank-ah an kai lut nia sawiin, "A ngaihna a awm lo. Loan min pûktir an tum ta ringawt mai a, mirethei leh ṭhalaite leiba min siamsak an tum ta ringawt mai a ni," a ti a; ZPM sorkar chu mipui inchhir niin a sawi.