KHAWTHLIR
KṬP-in thisen pe
KṬP, Salem Veng Branch chuan an branch din champha pualin nimin khan Synod Hospital tan thisen unit 55 an pe a, petute mipa 46 leh hmeichhia pakua an ni. Helen Lowry HSS-in Civil Hospital, Aizawl tan thisen unit 59 an pe a, petute mipa 32 leh hmeichhia 27 an ni. KṬP, Thingdawl Bial pawhin nimin khan Thingdawl Hmarveng kohhran hall-ah thisen pek huaihawtin, Kolasib District Hospital tan thisen unit 30 an pe a, petute mipa 22 leh hmeichhia pariat an ni.
Jharkhand-ah Mizo Welfare din
Jharkhand-a Mizo awmte chuan November 16, 2024 khan Jharkhand Mizo Welfare an din a, thuchhuah siamin, "Jharkhand state-ah hnathawhna vang leh zirna avangin Mizo kan pung ve zel a, mumal zawka inrêlbâwlna leh inkaihhruaina, inpumkhatna ṭha zawk kan neih theih nan Jharkhand Mizo Welfare din a ni," an ti. JMW-ah hian Dr C Sawmliana chu president a ni a, secretary chu Lalchhandama a ni.
HSS Games 2024
School Education department buatsaihin November 26, 2024 khan Aizawlah Mizoram Higher Secondary School Games vawi 21-na ṭan a ni a, November 29, 2024-ah khâr a ni ang. Games hi Aizawla infiamna hmun hrang hrangah buatsaih a ni a, Aizawla HSS 14 leh Aizawl pawna HSS 15 aṭangin zirlai 10,00 leh zirtirtu 100 vel an tel a ni.
Restaurant endik
Lunglei District Advisory Committee on Safe Food & Healthy Diets chuan nimin khan Lungleia restaurant paruk an endik a, ei leh in siamna thianghlim dan leh ei tur an siam dan leh zawrh dan an enfiah. Endikna hmasaa hriattirna an pek thingpui dawr 12 pawh endik nawn lehin, inkaihhruainate an zawm ṭha tawh tih an hmu a ni.
No Tolerance Drive
Aizawl Traffic SP Stephen Lalrinawma chuan hriattirna chhuahin, December 9, 2024 aṭangin Aizawlah Aizawl Traffic Police-in No Tolerance Drive/Checking an kalpui dawn tih a tarlang. Traffic SP chuan, No Tolerance Drive chu lirthei kaihhnawih dan bawhchhiatna hrang hrang vanga vanduaina thleng thei venna atan a nih thu tarlangin, lirthei khalhtute chu dan zâwm a, fimkhur taka lirthei khalh tur leh lirthei document felfai tak nei turin a chah.