IAF hnena Lengpui Airport hlan dan tur zirtu turte an ṭhukhawm

Indian Air Force (IAF) hnena Lengpui Airport hlan chungchang zir chiang tura din, Working Committee to Look into the Maintenance and Management of Lengpui Airport chu an chairman TBC Lalvenchhunga, adviser to CM (Finance & Planning) kaihhruaiin nimin khan a pisaah an ṭhukhawm. Committee hi thla thum chhungin report thehlut tura tih a ni.

Sorkar thuchhuah tarlan danin, Working Committee hmasain Mizoram sorkar hnena Lengpui Airport enkawl zui zel dan tur chungchang report a thehluh chu October 16, 2024 khan Council of Ministers ṭhukhawmin a thuphungin a pawm. Cabinet thutlukna bawhzui zel turin Mizoram sorkar chuan TBC Lalvenchhunga, MLA kaihhruai Working Committee on Lengpui Airport a din thar leh a, nimin khan an ṭhukhawm a ni.

Mizoram sorkarin Terms of Reference a siam angin Working Committee hian IAF hnena Lengpui Airport hlan dan tur chungchang an zir chiang dawn a; IAF nen indawr zui zel a, draft memorandum of agreement thlenga ruahmanna mumal tak siam tura tih an nih bakah, thla thum chhungin report thehlut tura tih an ni.

November 20, 2024 khan Mizoram sorkar chuan Working Committee to Look into the Maintenance and Management of Lengpui Airport siam thar a nih thu an tarlang. Committee chairman atan TBC Lalvenchhunga leh member secretary atan GAD Commissioner & Secretary ruat an ni a; member panga - PPI Secretary, Home Secretary, Law & Judicial Secretary, Finance Additional Secretary leh GAD Aviation Wing Director-te ruat an ni bawk.