Mizoram châk lakna kawng pui ber March 2025-ah blacktop zawh beisei

Assembly deputy speaker Lalfamkima, Kolasib bialtu MLA ni bawk hoin nimin khan Kolasib DC conference hall-ah National Highway 306 leh 06 thawm ṭhat hna chak zawka thawh theih dan tur sawiho a ni. NHIDCL hotute chuan, Vairengte-Bilkhawthlir leh Kolasib-Kawnpui inkar chu March 2025-ah blacktop zawh hman an inbeisei thu an sawi.

Ṭhutkhawm hi Kolasib DC Robert C Lalhmangaiha'n a kaihruai a; Lalfamkima chuan, kawng ṭha neih a nih theih nan kawng hrang hranga hma lak a nih tawh ṭhin thu sawiin, "Chhan hrang hrang leh chhuanlam eng eng emaw avangin contractor-te'n duhthusamin hna an thawk ṭhin lo a, motor tam tak tan tlan a him lo a, nasa taka traffic a jam phah bakah, kan châk lak luhnain a tuar hle a ni," a ti.

Lalfamkima chuan, kawng chhiain a nghawng ber chu mipui an nih avangin mipui tana thawk an ni tih inhre turin NH enkawltu NHIDCL leh kawng siamtu contractor Balaji Construction leh Sadguru-te a chah a; Mizorama lung tam zawk chu lung chang ṭha a nih loh avangin state pawn aṭangin lung chang ṭha leh hmanraw pawimawh dangte la lut ṭhin turin a hrilh.

Bialtu MLA chuan, hna thawh theih hun chhung (working season) chu hmang ṭangkai tura chahin, "Rinawm takin in hnate thawk u la. Kawng ṭha neih theih nan hian sorkar mai ni lo, NGO hrang hrangte an pawimawh vek avangin theihtawp kan chhuahho a ngai a ni," a ti.

Ṭhutkhawmah hian NHIDCL leh contractor-te'n an hmalak tawhna leh hmachhawpte an tarlang a; NHIDCL hotute chuan, Vairengte-Bilkhawthlir leh Kolasib-Kawnpui inkar kawngpui chu March 2025 velah blacktop zawh hman an inbeisei thu an sawi. Pawl aiawhte pawhin chak zawka hna thawh a nih theih nan sorkar leh contractor-te chu theihtawp chhuah turin an chah bawk.