Traffic SP-in lirthei tlân dan a tidanglam

Aizawl Traffic SP Stephen Lalrinawma chuan hriattina chhuahin, kawng siam leh tui pipe phûm hna thawh a nih dawn avangin vawiin leh naktuk aṭangin Aizawl khawpui veng ṭhenkhatah lirthei tlân dan tihdanglam a nih thu leh, hmun ṭhenkhatah kawng khar a nih dawn thu a tarlang.

Traffic SP chuan, vawiin Ningani zing dar 9 aṭanga December 10, 2024 thleng Vaivakawn, Kanan Veng leh Chawnpui intawhkhawmna péngṭhuam thawm ṭhat a nih dawn thu a tarlang a, "Vaivakawn aṭanga Seventh Day Tlang panna kawng leh Upper Kanan aṭanga Chawnpui panna kawng khâr a ni dawn," a ti.

Traffic SP tarlan danin, Zotlang-Seventh Day Tlang/Helen Lowry School kawngah lirthei tlân chhoh phal a nih loh thu leh chhuk zawng chauha tlan theih a ni a; Vaivakawn-Zotlang kawngah chhoh zawnga tlan phal a ni lo a, chhuk zawng chauha thlan phal a ni. Vaivakawn aṭanga Kanan Veng, Chawnpui, Seventh Day Tlang leh Zotlang lama kal turte chu Middle Kanan/Vaivakawn Police Station lam kawngah emaw, Chhangurkawn lamah emaw kal theih a ni.

Vaivakawn-Kanan-Chawnpui-Zotlang-Chhangurkawn kawngah lirthei veivak tibuai thei tura lirthei leh bungraw dah khap a nih thu Traffic SP chuan a tarlang bawk.

Traffic SP chuan, PHE, Aizawl Water Transmission Division-in naktuk Zirtawpni chhun dar 12 aṭanga December 6, 2024 chhun dar 12 thleng Khatla Chawnga Road-ah tui pipe khuhna an siamṭhat dawn avangin kawngpui hi khar a nih dawn thu a tarlang.

Thupek zâwm lote chu MV (Amendment) Act, 2019 Section 179 hmanga hrem theih an ni.