Mizoram sorkar chuan tourist lodge, highway restaurant leh Tourism department enkawl thil dang 39 mi dang hnenah a hlân chhawng (outsource) tawh a; Tourist Lodge, Chaltlang pawh mi dang hnena hlan tuma hmalak mek a ni bawk.
Tourism department hotute hnen aṭanga thu dawn danin, Tourism depart-ment enkawl tourist lodge, highway restaurant leh thil/hmun dangte mi dang hnena hlan hi kum 2015 khan tih ṭan a ni.
Outsource hmasak ber chu Buhchanga Tourist Lodge niin, April 28, 2015 khan mi dang hnenah hlan a ni a; outsource hnuhnun ber hun chu September 1, 2023 kha niin, hemi ṭum hian tourist lodge 12 leh tourist resort pakhat outsource a ni.
Tourism department enkawl zinga mi dang hnena hlan tâk 39 zinga 26 chu tourist lodge a ni a, pali chu highway restaurant a ni. Tourist resort leh viewing gallery pahnih a tel a; tourist home, traveller's inn, picnic spot, payer hall leh hostel pakhat ṭheuh outsource a ni bawk.
Congress party-in sorkarna an chan laia outsource 16 a awm a, MNF party-in sorkarna an chan laia outsource 23 a awm a ni.
Hetih lai hian, Chaltlanga Tourist Lodge pawh outsource tuma hmalak mek a nih thu Tourism minister Lalrinpuii'n November 11, 2024 khan thuthar thehdarhtute hmaah a puang.
Tourism Minister chuan Chaltlang Tourist Lodge chu five star hotel-ah siam a nih theih nan mimal hnenah hlan tum a nih thu a sawi a, "Hotel chain lian tak takte'n Mizoramah 5-star hotel din an duhna (offer)-te kan hmu a, chuvangin, Chaltlang Tourist Lodge hi 5-star hotel a nih theih nan outsource mai turin hma kan la a, tih tur ang angte kan tifel nual tawh. Kan sorkar chhung ngeiin 5-star hotel kan neih theih ka beisei," a ti.
Tourism Minister sawi danin, Chaltlang Tourist Lodge outsource tur hian a hlutna hriat hmasak a ngaih avangin assets valuation ti turin PWD ngen an ni.
