Ruang endik zo thei lo

November 11, 2024 tlaia Jiribam, Manipur-a CRPF hoin an kah hlum Zo hnahthlak mi 10-te chu nimin khan Silchar aṭangin Mizoram kaltlanga Lamka, Manipur-ah lak tum an ni a, Central YMA-in Aizawlah lo hmuahna hun hman an tum bawk a; mahse, harsatna a awm avangin Silchar aṭangin an la chhuahpui thei lo.

Thu dawn danin, mi 10-te ruang hi November 12 khan Silchar Medical College-ah postmortem ṭan a ni a; mi paruk ruang endik a nih hnuah Ministry of Home Affairs-in endik zui a phal loh avangin mi pali ruang chu endik theih a ni rih lo. Hei vang hian nimina Silchar aṭanga Mizoram kaltlanga Lamka panpui tum pawh tih theih a ni lo.

Mi 10-te ruang hi Mizoram kaltlanga lak a nih chuan Central YMA-in Ṭhuampui, Aizawlah lo hmuah a tum a, khaw ṭhenkhatah YMA-in lo hmuah an tum bawk nia thu dawn a ni.

Barak Valley Hmar Inpui hruaitute chuan, an tawrhnaa lainattu Mizoram leh mipui te, ruang buaipuinaa puitu Silchar YMA leh Kuki leh Paihte mipuite chungah an lawm thu a sawi.