Puahtahtute hnenah ṭanpuina sum hlan: Dik takin hmang ang che u - Lalliansawta

Nimin khan Chhiahtlang North VC Hall-ah National Handloom Deve-lopment Programme (NHDP) hnuaia ṭanpuina, Chhiahtlang Handloom Pocket sem inkhawm buatsaih a ni a, ZORANDCO chairman Lalliansawta, ZPM president-in hmanpuiin, ṭanpuina sum dik taka hmang turin ṭanpuina dawngtute a chah.

NHDP hnuaia ṭanpuina sem inkhawm hi Comerce & Industries director Maria CT Zuali'n a kaihruai a; ZOHANDCO Chairman-in puantahtute hnenah ṭanpuina cheque a sem a ni.

ZOHANDCO Chairman chuan, eizawnna kawnga sorkar puihna dawngtute'n an dawn chhan ang taka sum an hman an phût tlat thu a sawi a, "Sorkarin duhsak taka in hmakhua ngaia eizawnna kawnga ṭanpuina a pek che u hi in hlawhtlinpui ngei theih nan dik tak leh rinawm takin hmang ang che u," a ti.

Lalliansawta chuan, ṭanpuina sum an dawnte chu thil danga an hman chuan scheme tihlawhchhamtu an ni dawn tih sawiin, "He scheme hlawhtlinna leh hlawhchhamnaah hian mawh in phur a ni. Eizawnna kawngah hian rinawmna pawimawh a, mi rinawm lo chu an dingchhuak mawh," a ti a; Chhiahtlanga puantahtute tan sorkar aṭanga ṭanpuina pek chhuah a ni ta chu lawmawm a tih thu a sawi.

ZOHANDCO Chairman chuan, kumina NHDP thupui chu 'Handloom pawimawhzia leh India economy hmasawna leh culture heritage chawi nunna atana a thawh hlawkzia mipuite hriattir' tih a nih thu sawiin, thupui ang takin puantahchu eizawnna rintlak a ni tih hria a, sorkar puihna nen hlawhtling ngei tum turin ṭanpuina dawngtute a chah bawk.