Mizo nurse-te Germany leh Israel-a hna thawh theih dan tur buaipui

Mizoram Youth Commission (MYC) chairman Malsawmzuala Ralte chuan nimin khan Greater Noida-a National Skill Development Corporation (NSDC) pisa tlawhin thawktute a kâwm a; Japan, Germany leh Israel-a nurse leh caregiver hna thawk turin Mizo ṭhalaite an kal theih nan thawhho an rêl.

Inkawmhonaah hian NSDC kaltlangin Mizo ṭhalai, nursing lama tawnhriat neite Japan rama caregiver hna thawk tur lak ni se, an ti a; Germany rama nurse hna ruakah Mizo nurse-te lak leh chumi atan chuan MYC Office-ah German ṭawng zirna hawn te, Israel-a caregiver hna thawh tur awmah Mizote an kal theih nan thawhhote an rel a ni.

Japan rama caregiver hna thawk turte chu NSDC Office, Noida-ah thla 9 chhung Japan ṭawng zirin an awm ang a, ṭawng an thiam hnuah an thawh tur NSDC-in an buaipui ang. Germany rama nurse hna thawhna turah pawh NSDC-in an buaipui vek dawn niin sorkar thuchhuah chuan a tarlang.

MYC Chairman hian Indigo Airlines pisa pawh tlawhin, an hotute a kâwm a; Mizo ṭhalaite tan cabin crew/air hostess lakna MYC Office, Aizawlah December 2024 thla tir lama neih turin ruahmanna siam ni se, an ti.

Malsawmzuala Ralte hian LESDE department kaltlanga Japan ṭawng zir mek Mizo ṭhalaite a tlawh nghal bawk.