Bazarpui satute zanah thawk tel turin ngen

Assembly Subject Committee-II chuan nimin zing khan Aizawl City Center Annexe (New Market) sak mek chu an endik. Chairman Lalchhuanthanga chuan, bazarpui sak ṭhat chu mipui mamawhna a nasat tawh avangin chak taka thawk tur leh, zan lamahte pawh thawk mai turin contractor-te a ngen.

Endiknaah hian Subject Committee-II chairman Lalchhuanthanga bakah, W Chhuanawma, Lalmuanpuia Punte, H Ginzalala, T Lalhlimpuia, RM Chakma leh Prova Chakma an tel a; Commerce & Industries department official-te'n an ṭawiawm.

Lalchhuanthanga chuan, Mizorama hmasawnna hnathawhte hun bituk chhunga thawh zawh loh a tam lutuk chuan sorkar leh mipui a tibuai ṭhin tih sawiin, "Chhungkaw khawsak a tibuai ṭhin. Contractor-te'n estimate revisean beisei leh ṭhin a, sorkar sumin a tuar phah a, ram hmasawnna a muan phah hle a ni," a ti.

Aizawl City Center Annexe building chu sak zawh hun tura biktuk a pêl thui tawh tih sawiin Lalchhuanthanga chuan, "Harsatna chu a awm ngei ang. Chutih laiin, mipuite'n kan chhawr duh tawh a, kan mamawh tawh a, zan lamahte pawh hna thawk mai turin contractor-te ka ngen che u a ni," a ti a; in sak a muan avangin chhungkaw tam tak eizawnnain a tawrh thu leh, chak zawka sak a nih theih nan Subject Committee-II pawhin theihtawp an lo chhuah ve tur thu a sawi.

Aizawl City Center Annexe building hi New Market building sak mek bula awm a ni a, a sak nan NEDP aṭangin cheng nuai 3,641.59 ruahman niin, Lushai Engineers-in an sa mek. Contractor hnenah hian September 28, 2018 khan sorkarin Letter of Acceptance a pe a, chhan hrang hrang vangin June 24, 2020 khan sak ṭan a ni.