KHAWTHLIR

Tomato man bithliah

All Mizoram Tomato Growers Association chu nimin khan Tualte Tomato Processing Centre-ah an ṭhukhawm a; Mizorama tomato tharte man inang tlanga hman relin, Aizawlah kg. khat Rs 35 leh tharna khuaah Rs 30-a hralh an rêl. "Rate bawhchhe khua chu an tomato latu commission-te ṭum khat an tomato lak tur khapsak (brake) ṭhin ni se," an ti.

MRMC ṭhukhawm

Chief minister Lalduhoma hoin nimin khan CMO conference hall-ah Mizoram Resource Mobilization Committee member-te an ṭhukhawm. MRMC rawtna sorkarin a bawhzui tawh chin leh sub-committee aṭanga rawtna lut thar - Commerce & Industry department, Taxation department leh Land Revenue & Settlement department hnuaia hmalakna tur chi pathum ṭheuh bakah, DPAR kaihhruaina hnuaia department inspection neih dan tur te sawiho a ni.

Minister tel

Minister of state Prof. Lalnilawma chu tun hnai khan Assam Administrative Staff College, Guwahati-a Pollution Control Board, Assam leh PHD Chamber of Commerce and Industry-in bio-fuel zirhona an buatsaihah a tel.

Kohhrana intluktlân lohna MZU-ah zirho

UGC - Women's Studies Centre, Mizoram University chuan nimin khan MZU School of Social Science Dean Conference Hall-ah 'Gender inequality in the church' (kohhrana mipa leh hmeichhia intluktlan lohna) zirhona leh sawihona an buatsaih a; United Theological College, Bangalore-a Women's Studies Department-a chairperson ṭhin Prof. Lalrinawmi Ralte chu resource person a ni.

Gelatin man

Assam Rifles leh Mizoram Police ṭang dun chuan November 12, Thawhlehni khan Lawipu vengah taxi pakhat aṭangin gelatin tlâwn 1,000, detonator 1,000 leh a dehkaina (fuse) metre 20 an man. A neitua puh mi pahnih - Lalhmingthanga (41), Bawngkawn leh Malsawmkimi (26), Zuangtui nia insawite an man bawk.