Bana Kaih pilot phase atan AH&Vety-ah mi 67 thlang

Animal Husbandry & Veterinary minister C Lalsawivunga hoin nimin khan Bána Kaih (Handholding) Scheme hnuaia AH&Vety depart-ment-a pilot phase-a hmalaknate sawiho a ni. Vety department kaltlangin Bana Kaih scheme pilot phase atan mi 67 thlan an nih thu an tarlang.

AH&Vety department-a Handholding scheme pilot phase atan hian diltu eng emaw zat zingah mi 67 thlan an ni a; ar vulh diltu 19, kel vulh diltu pariat, vawk vulh diltu 30, bawng vulh diltu paruk, ran chaw siamna diltu pahnih leh sa leh bawnghnute sawngbawlna lam siam diltu pahnih an ni. Mi 67-te tana loan senso ngai tur zat chu cheng nuai 1,700 chuang a ni.

Ṭhutkhawma tarlan danin, Handholding scheme pilot phase atana district-a Vety officer-te'n an thlante chu November 5-8, 2024 chhung khan search team-te'n hmun thumah inṭhenin an inah an kal chilh a, ran an vulhna (farm) dinhmun an en. Pilot phase atana thlante chu Planning & Programme Implementation department-ah Apex Body-in an en leh tura thehluh a ni ang.

Minister C Lalsawivunga chuan, Handholding scheme tihlawhtling tura AH&Vety department-in chak taka hma a la chu lawmawm a tih thu sawiin, a ṭul anga hma la zui zel turin a chah.

AH&Vety department-a Handholding nodal officer Dr Robert Rualthankhuma'n hamṭhatna dawngtu (progress partner) tur thlannaa search team-te zirchianna a tarlang bawk.