US Consulate buatsaih booth camp-ah Mizoram aṭangin hmeichhia 13 an tel

Kolkata, West Bengal-a US Consulate chuan Contact Base nen ṭang dunin nimin aṭang khan Kolkata-a American Center-ah Mizoram leh Tripura-a kutkawih eizawnna (entrepreneur) lam buaipuitu hmeichhiate tan Academy for Women Entrepreneurs (AWE) 4.0 Bootcamp to Empower Women Entrepreneurs an buatsaih.

Final Bootcamp-ah hian Mizoram aṭangin hmeichhia 13 leh Tripura aṭangin mi eng emaw zat an tel a, sorkar official leh sumdawnna lam buaipuitu mi dang 30 vel an tel bawk a; vawiinah chhunzawma zawh a ni ang.

Ni hnih awh boothcamp hi Mizoram leh Tripura-a hmeichhiate chhawmdawlna atana US Consulate-in AWE 4.0 an buatsaih hnukhàrna a ni a; sumdawnna lama mithiamte nen niminah hun an hmanho bakah, vawiinah an chhunzawm leh dawn a ni.

Ni hnih chhung hian kutkawih sumdawnna lama an kal zelna atana pawimawh leh hmasawn zelna tura pawimawhte sawiho a nih bakah, sumdawngte nen inkawmhona hun an hmang a, an kutchhuakte an pho lang bawk.

Boothcamp hmanpuitu US consul general Kathy Giles-Diaz chuan, AWE programme leh bootcamp an buatsaiha telte chu hmeichhhe hmasawnna tura hma an laknaa rahbi hmasa a nih thu a hrilh a, "Sumdawnna bul ṭanna leh in kal zelna turah a remchan ang zelin kan pui dawn che u a ni," a ti a; kutkawih eizawnna lama hma an laknaa an inhnamhnawih thei chu lawmawm a tih thu a sawi.

AWE Bootcamp hi AWE programme hnuaia India khawchhak lam leh hmarchhak biala ṭum li an buatsaihna a ni. AWE 4.0 hnuaiah hian Mizoram leh Tripura-a hmeichhia, mahni kutkawiha eizawnna buaipuitute kawng hrang hrangin ṭanpui an ni a; kum khat chhungin hmeichhia 70 chuang a ṭul anga ṭanpuiin hma an lakpui a ni.