Zangnadawmna pe turin YMA-in Central an phût

YMA Central Coordination Committee (CCC) nimina ṭhukhawm chuan resolution siamin, CRPF leh mi tu tih hriat lohte'n November 7 & 11, 2024-a Manipur-a Zo hnahthlak mi 11 an thahte leh an hliam tak chhungte hnenah zangnadawmna pe turin sorkar laipui an phût.

YMA CCC resolution chuan, November 7, 2024 zana Zaiawn, Jiribam district, Manipur-a in 17 hâl a ni leh Hermon Dew English Junior H/S-a zirtirtu Zosangkim Hmar w/o Ngurthansang Hmar râwng taka thah a ni leh, November 11-ah Central Reserve Police Force (CRPF)-te'n Zo hnahthlak mi 10 an kap hlum leh mi dang pakhat an kap hliam chu pawi an tih thu an tarlang.

Resolution-ah hian, Manipur-a Zo hnahthlakte chunga chetna chu YMA-in an dem tak zet tih tarlangin, "He thil thlenga mawhphurtute hi a rang thei ang bera chhui chhuah an nih theih nan leh an phu ang ngeia hrem an nih theih nan Central sorkarin hma la nghal rawh se," an ti.

Mitthi 11-te leh hliam mi pakhat chhungte hnenah zangnadawmna pe ngei turin sorkar laipui an phût a; Manipur tualchhung buaina chu a rang thei ang bera chingfel turin sorkar laipui an phût bawk.