Mizoramah mi 138-in cocoa an chíng

Horticulture department chuan nimin khan an directorate conference hall-ah cocoa chin leh enkawl zirhona an buatsaih a, State Planning Board vice chairman Dr Kenneth Chawngliana'n a hmanpui. Horticulture department hnuaiah cocoa chíngtu mi 138 an awm mek tih tarlan a ni.

Zirhonaa tarlan danin, Horticulture department hmalaknain kum 2022-23 chhung khan Kolasib leh Mamit district-a kut hnathawktu mi 138-te cocoa (chocolate tree) chìntir ṭan a ni. Cocoa ṭiak 15,000 an phun a, chu'ng zinga a zatve aia tam ṭha takin a nung mek.

Workshop on Cocoa Cultivation hi Horticulture director CH Lalmuanpuia'n a kaihruai a, kut hnathawktu mi 50 an tel. State danga cocoa enkawl lama mithiamte'n thil pawimawhte an zirtir a, zawhna leh chhanna hun hman a ni.

Dr Kenneth Chawng-liana chuan, cocoa chu loneih thlakna atana hman theih a nih thu a sawi a, "A chingtute tan hlawkna ni si, pawisa tam tak hmuh theihna tur cocoa chìn hi a tih chi viau dawn. Lo/huan nghet neih (permanent farming)-ah kan kal ṭan a ngai," a ti.

Cocoa chíngtute chu mithiamte thil zirtirte hlâwkpui ngei tura chahin Kenneth Chawngliana chuan, "Cocoa hi thlai dangte ang a nih lohna chu a daih reina hi a ni, commercial taka chin chuan kum 30 dáwn a rah thei," a ti a; cocoa tihlar leh a hlawhtlinna tura hmalaknaah theihtawp chhuah turin Horticul-ture department a chah.