Manipur-a Zo hnahthlak mi 10 thihna Mizorama political party-te'n an dem

November 7 & 11, 2024-a Manipur-a Zo hnahthlak mi 10 thah an nih chungchangah Mizorama political party hrang hrangin thuchhuah siamin, demna thu an puang.

Rorel lai ZPM party chuan, November 7-ah Meitei hoin Zairawn khuaa Zosangkim Hmar râwng taka an that chu an dem thu sawiin, "Mizo mipui thinlung a tináin, Meitei helte chêt dan leh Manipur sorkarin hemi chungchanga hmalakna a nei lo hi mak kan tiin kan dem tak zet a ni," an ti.

Sorkar laipuiin mipui venghim tura a dah CRPF-te'n November 11-ah Jakhradawr, Jiribam district-ah Zo hnahthlak mi 10 an kâp hlum chu hriatthiam har an tih thu sawiin ZPM chuan, "He thil thlen dan hi mak kan ti hle. CRPF-te'n village volunteer, mahni khua leh tui veng him tura inpete bum a, an silai dahthlaktir hnua an hnung lam aṭanga an kap hlum ta mai hi a nunràwnthlak kan ti a, kâp tura thu petu CRPF hotu chungah Central sorkarin a rang thei ang berin hremna na tak lek kawh se kan duh," an ti a; Manipur buaina chingfel thuai turin sorkar laipui an an phût.

ZPM chuan, Zosangkim Hmar leh village volunteer mi 10-te thihna chu ná an tih thu sawiin, "Kan sûn tak zet a, ram leh hnam tana nun hlan martarte hi thinlung takin zahna chibai kan bûk a ni," an ti.

MNF party chuan, ṭan bik nei loa hna thawk tur CRPF-te'n Mizo volunteer, mahni khua venga duty mi 10 an kâp hlum chu pawi an tih thu sawiin, "Mizo pasalṭha, hnam chhana nunna chánte kan sûn tak meuh," an ti a, mitthi chhungte Pathianin awmpui se an duh thu an tarlang.

Zo hnahthlak mi 10-te thihna chu thinrimthlak an tih thu sawiin MNF chuan, "CRPF-te chet dan hi demawm kan tiin, thliar bik neia Zo hnam chunga an khawsak dan hian kan hnam thinlung a vit thûk hle. Remna leh muanna lam aia buaina tizual tur zawnga an chêtna hian India ram tan rah ṭha lo tak a hrin kan hlau hle a ni," an ti.

MNF chuan, hnam pasalṭha 10-te ruang Silchar aṭangin Lamka panpui tura Mizoram an paltlangnaa hmun hrang hranga lo hmuahnaah a tam thei ang ber tel turin mipui an ngen a; Central YMA-in Ṭhuampuia lo hmuah an tum chu an thlâwp thu an sawi bawk.

Congress Ṭhalai chuan, Manipur-a Zo hnahthlakte tawrhna pawi an tih thu sawiin, "Mipui himna tura thawktu tur leh palai hna thawktu tur CPRF-in mipui rîkrâp zawnga an che hian BJP sorkar chêt râwvàzia a tarlang," an ti.

MPYCC chuan, remna leh muanna tiṭhuanawp zawng leh buaina tipunlun zawnga chetna a rang lama titawp turin Manipur sorkar leh sorkar laipui an ngen a; khawvel hmuha India ram hmai tibâltu, remna leh muanna palzûttute hrem turin Manipur sorkar leh Central an phût.

Congress Ṭhalai chuan, "Mi dang tana nunna hlu tak hlântute hi thinlung takin thlahna hun hmannaah zahna kan hlan dawn a ni," an ti.