SBM-G ODF Plus Model-ah hmarchhakah Mizoram 2-na

Union Jal Shakti minister CR Patil hoin tunhnai khan Guwahati-ah hmarchhak state minister-te pualin Swatchh Bharat Mission - Grameen (SBM-G) hnuaia hmalaknate thlirhona hun hman a ni a, Mizoram PHE minister Prof. Lalnilawma a tel. Hmarchhak state-ah Mizoram chu open defecation free (ODF) plus model-ah pahnihna a ni.

Tarlan danin, hmarchhak state-ah thingtlang khua 51% chuan ODF plus model an thleng tawh a; Sikkim-in ti ṭha berin, 100% an ni tawh. Mizoram chuan dawtin 86% ODF plus model a thleng tawh a ni.

Ṭhutkhawmah hian SBM-G hnuaia India hmarchhak state hrang hranga hmalaknate thlir let niin, hnathawh dan leh hmalaknate thlirho a ni a; hmarchhak state-ah Mizoram chu ti ṭha pawl ni mah se, hmasawnna tur tam tak a la neih thu tarlan a ni.

Prof. Lalnilawma chuan, nasa zawka Mizoramin ṭan lak a tum thu leh amah ngei pawhin department-te nasa zawka lo enpui a tum thu a sawi.

Jal Shakti Minister chuan, hmarchhak state-te'n harsatna karah theihtawp chhuaha faina leh thianghlimna lama hma an la leh rah ṭha tak hmuh tur a awm chu lawmawm a tih thu a sawi a, "Individual household toilet (IHHT) dilnate ni 30 chhunga buaipui hman tur a ni a, tuna la khaihlak mekte chu ni 15 chhungin zo hman ang che u," a ti.

PHE minister Prof. Lalnilawma hi PHE chief engineer H Duhkima'n a ṭawiawm a ni.